Shavkat Mirziyoyev 7-aprel kuni Parlamentlararo ittifoqning ushbu nufuzli tuzilma raisi Tuliya Ekson va bosh kotibi Martin Chungongdan iborat delegatsiyasini qabul qildi. Bu haqda Prezident matbuot xizmati xabar berdi.
Parlamentlararo ittifoqning yuqori darajali vakillari davlat rahbarini Toshkent shahrida tashkilotning yubiley Assambleyasi muvaffaqiyatli tashkil etilgani hamda uning yalpi majlisida dasturiy nutq so‘zlagani bilan qutladi. Bunday keng ko‘lamli forumning O‘zbekistonda o‘tkazilayotgani va ilgari surilgan tashabbuslar to‘liq qo‘llab-quvvatlangani Yangi O‘zbekistondagi ortga qaytmas islohotlar, ayniqsa, parlamentarizmni rivojlantirish borasidagi natijalarning xalqaro e’tirofi ekani ta’kidlandi.
Ittifoq bilan hamkorlik yuksak darajaga chiqib, samarali tus olgani qayd etildi. Keyingi yillarda birgalikdagi sa’y-harakatlar bilan Buxoro shahrida Barqaror rivojlanish maqsadlari bo‘yicha parlamentlararo forum hamda Toshkent shahrida parlamentlar ayol rahbarlarining 14-sammiti tashkil etildi.
Bundan tashqari, BMT Bosh assambleyasining Barqaror rivojlanish maqsadlariga erishishda parlamentlar rolini kuchaytirish to‘g‘risidagi maxsus rezolyutsiyasi qabul qilindi. Suhbat chog‘ida mamlakatlar va xalqlar o‘rtasida tinchlik va konstruktiv muloqotni mustahkamlash, yashil taraqqiyot va sun’iy intellekt sohasida qonun ijodkorligini kengaytirish, xotin-qizlar va yoshlarni parlament faoliyatiga yanada ko‘proq jalb etish bo‘yicha dasturlarni amalga oshirishda parlament diplomatiyasining ahamiyati qayd etildi.
Uchrashuv yakunida O‘zbekiston prezidenti hamkorlikni rivojlantirish va parlament diplomatiyasini samarali ilgari surishga qo‘shgan katta hissasi uchun Parlamentlararo ittifoq bosh kotibi Martin Chungongni “Do‘stlik” ordeni bilan taqdirladi. Bu bo‘yicha farmon ham imzolandi.
Ta’kidlanishicha, O‘zbekiston 2017-yilda Ittifoq ishidagi ishtirokini qayta tikladi va bugungi kunda uning ijro etuvchi tuzilmalarida to‘laqonli qatnashmoqda.
Shavkat Mirziyoyev 7-aprel kuni Toshkentda bo‘lib o‘tayotgan Parlamentlararo ittifoqning 150-yubiley assambleyasi doirasida Ozarbayjon Milliy Majlisi raisi Sohiba Gafarovani, Rossiya Federal Majlisi federatsiya kengashi raisi Valentina Matviyenkoni, Belarus Milliy Majlisi respublika kengashi raisi Natalya Kochanovani ham qabul qildi. Suhbat davomida ikki davlat o‘rtasidagi do‘stlik, strategik sheriklik va ittifoqchilik munosabatlarini yanada kengaytirish va mustahkamlashning masalalari ko‘rib chiqildi.
Parlamentlararo ittifoqning 150-yubiley assambleyasi
Parlamentlararo ittifoqning 150-yubiley assambleyasi 5-aprel kuni Toshkent shahrida o‘z ishini boshladi. 6-aprelda Parlamentlararo ittifoqning 150-yubiley assambleyasining “Ijtimoiy taraqqiyot va adolat uchun parlament harakati” mavzusidagi birinchi yalpi majlisi bo‘lib o‘tdi. 7-aprel kuni Shavkat Mirziyoyev Parlamentlararo ittifoqning 150-yubiley assambleyasi yalpi majlisida nutq so‘zladi. Anjumanda 140 ga yaqin davlatdan 2 mingdan ziyod delegatlar qatnashmoqda. O‘z safida 181 ta milliy parlament va 15 ta mintaqaviy uyushmani birlashtirgan Ittifoqning assambleyasi ilk marta Markaziy Osiyo mintaqasida bo‘lib o‘tmoqda.
Izoh (0)