Ekologiya, atrof-muhitni muhofaza qilish va iqlim o‘zgarishi vazirligi Jahon banki bilan hamkorlikda “O‘zbekistonda barqaror landshaftlarni tiklash” (Resiland) loyihasini boshladi.
Loyihani amalga oshirish uchun Jahon banki tomonidan 153 million dollar miqdorida imtiyozli kredit va grantlar ajratiladi. Bu haqda bank matbuot xizmati xabar berdi. Ushbu loyiha Markaziy Osiyoning beshta davlatida o‘rmonlar va degradatsiyaga uchragan yerlarni tiklashga ko‘maklashish bo‘yicha mintaqaviy dasturning bir qismi hisoblanadi.
Loyiha mamlakatning turli hududlarida landshaftlar barqarorligini oshirish va o‘rmonlarni qayta tiklash, shuningdek, O‘zbekistonning Markaziy Osiyodagi boshqa davlatlar bilan transchegaraviy tabiiy hududlarni qayta tiklash bo‘yicha hamkorligini mustahkamlashga qaratilgan. Tegishli loyiha tadbirlari mamlakatning oltita hududida, jumladan, Jizzax, Qashqadaryo, Namangan, Samarqand, Surxondaryo va Sirdaryo viloyatlarida amalga oshiriladi.
Loyiha doirasida:
- mamlakatning oltita mintaqasida daraxtlardan foydalangan holda degradatsiyaga uchragan yerlarni tiklash ishlarini olib boriladi (agroo‘rmonchilik, o‘rmon plantatsiyalari, mevali bog‘lar, o‘rmon-yaylov tizimlari).
- qo‘riqlanadigan tabiiy hududlar va o‘rmon qo‘riqxonalarida turizm markazlari, ma’muriy obyektlar, kempinglar, piknik zonalari, turistik marshrutlar va boshqa ko‘ngilochar maskanlarni o‘z ichiga olgan zarur infratuzilma yaratilishi moliyalashtiriladi.
Xabarda aytilishicha, loyiha hukumatga O‘zbekiston o‘rmon xo‘jaligi tizimini 2030-yilgacha rivojlantirish konsepsiyasi maqsadlariga erishishda yordam beradi. Ular orasida o‘rmonlar maydonini 10 yillik oxirigacha 6,1 million gektarga yetkazish ham bor.
Yerlari degradatsiyaga uchragan hududlarga daraxtlar ekish orqali loyiha mahalliy landshaftlarning barqarorligini va oziq-ovqat tizimlarining mahsuldorligini oshiradi, aholining turmush sharoitini yaxshilash, infratuzilmani rivojlantirish va shu sohada ish o‘rinlarini yaratishga xizmat qiladi. Bundan tashqari, loyiha tabiiy resurslardan yanada samarali foydalanish orqali kichik va o‘rta biznesni qo‘llab-quvvatlaydi va tabiatni muhofaza qilish zonalarida ekoturizmni rivojlantirishga yordam beradi.
Shavkat Mirziyoyev 4-aprel kuni Samarqand xalqaro iqlim forumining yalpi sessiyasida so‘zga chiqqanida bugungi kunda Markaziy Osiyodagi jami yer maydonining 20 foizdan ortig‘i degradatsiyaga uchraganini, chorak asrdan so‘ng hosildorlik uchdan bir qismga kamayishi mumkinligini aytgandi.
Maʼlumotlarga ko‘ra, O‘zbekiston O‘rmon xo‘jaligi agentligidagi o‘rmon bilan qoplangan yer maydoni 4,4 million gektarni tashkil qiladi. Bu umumiy yer maydonining 10,6 foizini tashkil qiladi. Oxirgi 10 yil ichida mamlakatda o‘rmonzorlar maydonini ko‘paytirishga jiddiy e’tibor qaratildi. Xususan, Orol dengizining qurigan tubida o‘rmon barpo etish hajmi keskin ko‘paytirildi.
Prezidentining 2024-yil 27-martdagi “Xalqaro taraqqiyot uyushmasi ishtirokida (Jahon banki) “O‘zbekistonda barqaror o‘rmon landshaftlarini tiklash” loyihasini amalga oshirish chora-tadbirlari to‘g‘risida”gi qaroriga muvofiq respublikaning 176 ming gektar yer maydonida o‘rmonzorlarning tabiiy tiklanishiga ko‘maklashish, 38,5 ming gektar yer maydonlarida yaylovlarni qayta tiklash, 15 ming gektar yer maydonida suvni tejash va tog‘ o‘rmonlarida tuproq eroziyasiga qarshi kurashish, 14,2 ming gektar yer maydonlarida agroo‘rmonchilik tadbirlarini amalga oshirish, 5 ming gektar yer maydonda sanoatbop o‘rmonzorlar tashkil qilish hamda 5 ming gektar yer maydonida dorivor o‘simliklar plantatsiyalarini tashkil qilish ishlari amalga oshirilmoqda.
Izoh (0)