“Ochiq byudjet” portalida 5-apreldan boshlab “Mening bog‘im” loyihasining 2025-yilgi mavsumi doirasida loyiha kiritish bosqichi boshlandi. Bu haqda Iqtisodiyot va moliya vazirligi xabar berdi.
Ma’lum qilinishicha,
- loyiha kiritish bosqichi — 5–14-aprel;
- saralash bosqichi — 15–20-aprel;
- ovoz berish bosqichi — 21–30-aprel kunlari o‘tkaziladi.
“Mening bog‘im” loyihasi haqida
Ushbu loyiga portalda jamoatchilik fikri asosida yashil bog‘ va yashil jamoat parklarini tashkil qilish bo‘yicha loyihalarni shakllantirish, saralash, ovoz berish yo‘li orqali g‘olib loyihalarni aniqlash hamda moliyalashtirishni o‘z ichiga olgan jarayondir.
“Mening bog‘im” loyihasi 2024-yildan ishga tushirilgan. O‘sha yilning mart oyida Shavkat Mirziyoyev Ekologiya vazirligiga loyihani ishga tushirishni topshirdi. Bunga byudjetda 50 milliard so‘m ajratildi.
“Mening bog‘im” loyihalarini shakllantirish va moliyalashtirish tartibi to‘g‘risidagi nizomga ko‘ra, Ekologiya vazirligi “Yashil makon” umummilliy loyihasi uchun byudjetdan ajratilgan mablag‘larning kamida 50 foizini “Mening bog‘im” loyihalari doirasida yashil bog‘ va yashil jamoat parklarini tashkil etishni moliyalashtirish uchun tumanlarga (shaharlarga) teng taqsimlagan holda vazirlik hududiy bo‘linmalarining maxsus shaxsiy g‘azna hisobvaraqlariga o‘tkazadi.
2024-yilda “Mening bog‘im” loyihasi 23-iyundan 7-iyulga qadar davom etib, 215 ta loyiha g‘olib deb topilgandi. G‘olib bo‘lgan loyihalarni moliyalashtirish uchun respublika bo‘yicha 48,6 milliard so‘m mablag‘ yo‘naltirilgandi.
Izoh (0)