Prezident Markaziy saylov komissiyasi raisi Zayniddin Nizomxo‘jayevni “O‘zbekiston Respublikasida xizmat ko‘rsatgan yoshlar murabbiysi” faxriy unvoni bilan taqdirladi.
Prezident farmoniga muvofiq u davlat hokimiyati vakillik organlari hamda mamlakat sog‘liqni saqlash tizimidagi ko‘p yillik samarali mehnati, yurtimizda milliy saylov tizimini umume’tirof etilgan xalqaro standartlar asosida takomillashtirish, demokratik islohotlarni muvaffaqiyatli amalga oshirish, fuqarolarning konstitutsiyaviy huquqlarini ro‘yobga chiqarish borasidagi katta xizmatlari, yuksak salohiyatli kadrlarni tayyorlash, yosh avlodni ona vatanga muhabbat va sadoqat ruhida tarbiyalashga qo‘shgan munosib hissasi, shuningdek, tavalludining 70 yilligi munosabati bilan ushbu unvon bilan taqdirlandi.
19-mart kuni Shavkat Mirziyoyev Zayniddin Nizomxo‘jayevga ushbu yuksak unvon va ko‘krak nishonini topshirdi.
Tibbiyot fanlari doktori, professor Zayniddin Nizomxo‘jayev uzoq yillar qator mas’ul lavozimlarda fidokorona mehnat qilgan. U 2014-yilda O‘zbekiston Qahramoni unvoni bilan mukofotlangan.
Zayniddin Nizomxo‘jayev 2021-yilning fevralidan buyon Markaziy saylov komissiyasi raisi lavozimida ishlab kelmoqda.
Izoh (0)