Samarqand va Buxoro viloyatlarida noruda foydali qazilmalarni o‘zboshimchalik bilan qazib olish holatlari fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Qo‘shrabot tumanida “Sh.B.” MCHJ rahbari A.X. va boshqalar “Shova” MFY hududidan o‘tuvchi soy bo‘yidan noruda foydali qazilma hisoblangan qum-shag‘al aralashmasini korxona maxsus texnikalari yordamida qazib olgan. Ularning MCHJ ishlab chiqarish sexiga yetkazib berayotganliklari aniqlanib, 3 dona maxsus texnikalar ashyoviy dalil sifatida rasmiylashtirilgan.
Shuningdek, o‘tkazilgan tergovga qadar tekshiruvda MCHJ masʼul shaxslari jami 35,8 ming kub hajmdagi qum-shag‘al aralashmasini o‘zboshimchalik bilan qazib olgani aniqlandi. Natijada davlat va jamiyat manfaatlariga 3,9 mlrd so‘m zarar yetkazilgan.
Bundan tashqari, Buxoro tumanidagi gips koni hududidan “S.m.”, “W.g.”, “A-G.”, “K.Z.” va “B.G.” MCHJ masʼul shaxslari jami 33,5 ming kub hajmdagi gips toshlarini o‘zboshimchalik bilan qazib olgan. Natijada davlat va jamiyat manfaatlariga 3,4 mlrd so‘m zarar yetkazilgan.
Mazkur holatlar yuzasidan Jinoyat kodeksining 229-moddasi (o‘zboshimchalik) va 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiisteʼmol qilish) bilan jinoyat ishlari qo‘zg‘atilib, tergov harakatlari o‘tkazilmoqda.
Noruda materiallarni qazib olish holatlari
Hukumat qarori bilan noruda materiallarni qazib olish bo‘yicha moratoriy tatbiq etilgan hududlarning chegaralari belgilangandi. Bunda moratoriy tatbiq etiladigan daryolar hududlari chegaralariga daryo o‘zanlari, ularning sohilbo‘yi mintaqalari va suvni muhofaza qilish zonalari kiradi.
Bundan avval Qashqadaryoda tabiiy qum qazib olinishi natijasida tabiatga 6 mlrd so‘mdan ortiq zarar yetkazilgani haqida xabar berilgandi.
2024-yilning oktyabr oyi oxirida Chirchiq daryosidan qum-shag‘al aralashmasi qazib olinishi oqibatida tabiatga 273,8 mlrd so‘m zarar yetkazilgandi.
Noyabr oyi boshida esa Qashqadaryo va Samarqand viloyatlarida foydali qazilmalarni o‘zboshimchalik bilan qazib olish holatlari fosh etilgandi. Chirchiq daryosidan qum-shag‘al aralashmasi qazib olinishi oqibatida tabiatga 273,8 mlrd so‘m zarar yetkazilgani haqida xabar berilgandi.
Izoh (0)