Turkiya g‘arbida zilzila sodir bo‘ldi, yer silkinishlari Istanbulning Yevropa qismida ham sezildi, deb xabar bermoqda “RIA Novosti”.
Mahalliy vaqt bilan 10:43 da kamida uchta silkinish sodir bo‘lgan. Tabiiy ofatlar oqibatlarini bartaraf etish boshqarmasi seysmologlari maʼlumotlariga ko‘ra, 5,1 magnitudali zilzila epitsentri Bursa viloyatining Mudanya shahri yaqinida joylashgan, zilzila o‘chog‘i esa atigi besh kilometrdan ozroq chuqurlikda yotgan.
Turkiya Ichki ishlar vazirligi rahbari Ali Yerlikaya X ijtimoiy tarmog‘ida maʼlum qilishicha, mutaxassislar zilziladan keyin zararni tekshirishga kirishgan.
Olimlar Istanbul va Marmara dengizida 7 balldan yuqori kuchli zilzila bo‘lishini, buning iqtisodiy oqibatlari butun Turkiyaga sezilishini bashorat qilmoqda.
Istanbul mamlakat yalpi ichki mahsulotining 35 foizini taʼminlaydi. Shahar meri Ekrem Imomo‘g‘li zilzila bo‘lishi muqarrar, ammo falokat qachon yuz berishini aniq bashorat qilib bo‘lmaydi, deb aytgan. U zilzila oqibatlarini bartaraf etish rejalarini taqdim etgan. Shahar meriyasi hisob-kitoblariga ko‘ra, 7,5 magnitudali zilzila sodir bo‘lgan taqdirda, kamida 90 ming bino vayron bo‘lishi mumkin, 4,5 millionga yaqin fuqaro vaqtinchalik uy-joyga muhtoj bo‘ladi.
Eslatib o‘tamiz, 2023-yilning 6-fevralida Turkiya janubi-sharqida va Suriya shimolida 7,8—7,5 magnitudali kuchli zilzilalar sodir bo‘ldi, har ikki mamlakatda 60 mingga yaqin odam halok bo‘ldi.
Turkiyada vayronagarchilik ko‘lami shaharsozlik standartlari va ishlab chiqaruvchilarning mas’uliyatsizligi haqidagi munozaralarni kuchaytirdi, tabiiy ofatdan keyin qurilish biznesi vakillarini hibsga olish boshlandi. Iyul oyi o‘rtalarigacha 350 kishi hibsga olingan.
Izoh (0)