Joriy yilning 23-24-avgust kunlari Samarqand shahrida xalqaro triatlon bo‘yicha an’anaviy “Challenge Samarkand-2025” musobaqasi bo‘lib o‘tdi. Mazkur sport tadbiri zamonaviy “Silk Road Samarkand” turizm majmuasi hududida tashkil etildi.
Erkaklar o‘rtasidagi bahslarda ingliz sportchisi Uill Dreper mutlaq ustunlikni namoyish etdi. U suzish va velosiped bosqichlarida ham peshqadamlikni qo‘ldan boy bermay, yakunda 3 soat 36 daqiqa 17 soniya natija bilan marrani birinchi bo‘lib kesib o‘tdi. U ikkinchi o‘rinni egallagan fransiyalik Klement Mignonni 5 daqiqa ortda qoldirdi. Shveysariyalik Andrea Salvisberg esa uchinchi o‘rinni egalladi.
Ayollar musobaqasida ispaniyalik sportchi Sara Peres Sala baland tog‘ sharoitida olib borgan tayyorgarligining samarasi sifatida kuchli raqiblarini ortda qoldirishga muvaffaq bo‘ldi. U 4 soat 2 daqiqa 45 soniyada marraga yetib bordi. Ikkinchi va uchinchi o‘rinlarni mos ravishda germaniyalik Atina Xempen hamda vengriyalik Kamil Esling egalladi.
Ma’lumot o‘rnida, Triatlon — bu uch bosqichdan iborat sport turi bo‘lib, unda ishtirokchilar ketma-ket suzish, velosiped haydash va yugurish orqali belgilangan masofani bosib o‘tadilar. Mazkur sport turi yuqori jismoniy tayyorgarlik va bardoshlilikni talab qiladi.
Izoh (0)