So‘nggi yillarda O‘zbekistonda tadbirkor bo‘laman deganlar soni kun sayin oshib bormoqda. 2017-yildan keyin tadbirkorlik muhiti keskin o‘zgardi. Kichik va o‘rta tadbirkorlar soni besh yilda 2 karra ko‘paygan, ularda 10,5 million odam daromad topib, ro‘zg‘or tebratmoqda.
Davlatning biznesga aralashuvini kamaytirish va tadbirkorlarning huquqiy himoyasini mustahkamlash yo‘lidagi harakatlar o‘z samarasini ko‘rsatdi.
Biznesni yuritish uchun qator to‘siqlar olib tashlandi. Rejadan tashqari tekshiruvlar bekor qilindi, tadbirkorlarning huquqlarini himoya qilish mexanizmlari kuchaytirildi.
Qo‘shimcha qiymat solig‘i stavkasi 12 foizga tushirildi va 2028-yil 1-yanvarga qadar QQS hamda foyda solig‘i stavkasi oshirilmasligi belgilab qo‘yildi. QQS qaytarish muddatini qisqartirish, yagona soliq stavkasi joriy qilinishi tadbirkorlar uchun muhim qadam bo‘ldi.
Davlat rahbarining bugun kichik va o‘rta biznes vakillari bilan o‘tkazgan uchrashuvida ham qator muhim tashabbuslar ilgari surildi, 2025 yil uchun asosiy maqsad va vazifalarni belgilab berildi.
Xususan:
- kichik va o‘rta biznesning iqtisodiyotdagi ulushini 55 foizga ko‘tarib, 70 milliard dollarlik qo‘shilgan qiymat yaratish;
- kichik biznes eksportini o‘tgan yilgi 9 milliarddan 12 milliard dollarga olib chiqish;
- 1,5 million doimiy ish o‘rni tashkil qilib, sohada band aholi ulushini 75 foizga yetkazish;
- kichik biznesda yangi 100 ta brend mahsulot chiqarishni yo‘lga qo‘yish;
- kichik biznes ishtirokida 200 ta startap loyihalarni moliyalashtirish kabi maqsadlar ko‘zda tutilmoqda.
Kichik va o‘rta biznesni rivojlantirish bo‘yicha xorijiy ekspertlar bilan katta dastur ishlab chiqildi. Bunga 2025 yilda barcha manbalar hisobidan 10 milliard dollar ajratiladi.
“Bu yil kichik va o‘rta biznesga 120 trillion so‘m resurs beriladi. Buncha katta mablag‘ ilgari hech qachon bo‘lmagan”, dedi davlatimiz rahbari.
Aholini tadbirkorlikka jalb qilish uchun 22 trillion so‘mlik imtiyozli resurs ajratiladi. Shundan 2,5 trillion so‘m yoshlarga, yana shunchasi ayollar tadbirkorligi loyihalari uchun yo‘naltiriladi. Ayol tadbirkorlarga kredit stavkasi boshqalarga nisbatan 2 foiz arzon bo‘ladi.
Kichik biznesdagi kelgusi qadamlarni belgilab beradigan besh yillik strategiya ham ishlab chiqildi. Buni xalqaro moliya tashkilotlari qo‘llab-quvvatlab, yangi biznes yo‘nalishlari bo‘yicha ilg‘or tajriba, innovatsiya, texnologiya va xalqaro standartlarni joriy qilishda ko‘maklashishga, buning uchun hozirni o‘zida 470 million dollar resurs ajratishga tayyor.
Tadbirkorlikka endi qadam qo‘yganlar uchun “birinchi imkoniyat” tamoyili joriy etiladi. Ya’ni ilk bor ma’muriy huquqbuzarlik qilgan tadbirkor javobgarlikdan ozod qilinib, kamchilikni bartaraf etish uchun imkoniyat beriladi. Bundan tashqari, hozirda barcha toifadagi tadbirkorlarga faoliyatini tugatish uchun bir xil talab belgilangan.
Ya’ni, kattami-kichikmi, barchasi moliyaviy auditdan o‘tishga majbur. Oqibatda ixtiyoriy tugatishga ariza bergan minglab kichik korxonalar qachon tekshiruvchi kelib, auditdan o‘tkazishini kutib o‘tiradi. Endi bu jarayon ham soddalashtiriladi. Oxirgi uch yillik aylanmasi 10 milliard so‘mdan oshmagan, soliqdan qarzi bo‘lmagan korxonani ixtiyoriy tugatishda tekshiruv o‘tkazilmaydi.
Endilikda kichik va o‘rta biznesga qo‘shimcha talab va majburiyat yuklaydigan normativ hujjatlar qabul qilishga ham uch yillik moratoriy e’lon qilinadi.
Davlat rahbari tadbirkorlardan bir narsada ko‘ngillari to‘q bo‘lishini aytdi: “Prezident doimo sizlarga eng yaqin ko‘makchi, tayanch va suyanch bo‘ladi. Sizlar yangilik qilishdan charchamanglar, men qo‘llab-quvvatlashdan charchamayman”.
Izoh (0)