Сўнгги йилларда Ўзбекистонда тадбиркор бўламан деганлар сони кун сайин ошиб бормоқда. 2017 йилдан кейин тадбиркорлик муҳити кескин ўзгарди. Кичик ва ўрта тадбиркорлар сони беш йилда 2 карра кўпайган, уларда 10,5 миллион одам даромад топиб, рўзғор тебратмоқда.
Давлатнинг бизнесга аралашувини камайтириш ва тадбиркорларнинг ҳуқуқий ҳимоясини мустаҳкамлаш йўлидаги ҳаракатлар ўз самарасини кўрсатди.
Бизнесни юритиш учун қатор тўсиқлар олиб ташланди. Режадан ташқари текширувлар бекор қилинди, тадбиркорларнинг ҳуқуқларини ҳимоя қилиш механизмлари кучайтирилди.
Қўшимча қиймат солиғи ставкаси 12 фоизга туширилди ва 2028 йил 1 январга қадар ҚҚС ҳамда фойда солиғи ставкаси оширилмаслиги белгилаб қўйилди. ҚҚС қайтариш муддатини қисқартириш, ягона солиқ ставкаси жорий қилиниши тадбиркорлар учун муҳим қадам бўлди.
Давлат раҳбарининг бугун кичик ва ўрта бизнес вакиллари билан ўтказган учрашувида ҳам қатор муҳим ташаббуслар илгари сурилди, 2025 йил учун асосий мақсад ва вазифаларни белгилаб берилди.
Хусусан:
- кичик ва ўрта бизнеснинг иқтисодиётдаги улушини 55 фоизга кўтариб, 70 миллиард долларлик қўшилган қиймат яратиш;
- кичик бизнес экспортини ўтган йилги 9 миллиарддан 12 миллиард долларга олиб чиқиш;
- 1,5 миллион доимий иш ўрни ташкил қилиб, соҳада банд аҳоли улушини 75 фоизга етказиш;
- кичик бизнесда янги 100 та бренд маҳсулот чиқаришни йўлга қўйиш;
- кичик бизнес иштирокида 200 та стартап лойиҳаларни молиялаштириш каби мақсадлар кўзда тутилмоқда.
Кичик ва ўрта бизнесни ривожлантириш бўйича хорижий экспертлар билан катта дастур ишлаб чиқилди. Бунга 2025 йилда барча манбалар ҳисобидан 10 миллиард доллар ажратилади.
“Бу йил кичик ва ўрта бизнесга 120 триллион сўм ресурс берилади. Бунча катта маблағ илгари ҳеч қачон бўлмаган”, деди давлатимиз раҳбари.
Аҳолини тадбиркорликка жалб қилиш учун 22 триллион сўмлик имтиёзли ресурс ажратилади. Шундан 2,5 триллион сўм ёшларга, яна шунчаси аёллар тадбиркорлиги лойиҳалари учун йўналтирилади. Аёл тадбиркорларга кредит ставкаси бошқаларга нисбатан 2 фоиз арзон бўлади.
Кичик бизнесдаги келгуси қадамларни белгилаб берадиган беш йиллик стратегия ҳам ишлаб чиқилди. Буни халқаро молия ташкилотлари қўллаб-қувватлаб, янги бизнес йўналишлари бўйича илғор тажриба, инновация, технология ва халқаро стандартларни жорий қилишда кўмаклашишга, бунинг учун ҳозирни ўзида 470 миллион доллар ресурс ажратишга тайёр.
Тадбиркорликка энди қадам қўйганлар учун “биринчи имконият” тамойили жорий этилади. Яъни илк бор маъмурий ҳуқуқбузарлик қилган тадбиркор жавобгарликдан озод қилиниб, камчиликни бартараф этиш учун имконият берилади. Бундан ташқари, ҳозирда барча тоифадаги тадбиркорларга фаолиятини тугатиш учун бир хил талаб белгиланган.
Яъни, каттами-кичикми, барчаси молиявий аудитдан ўтишга мажбур. Оқибатда ихтиёрий тугатишга ариза берган минглаб кичик корхоналар қачон текширувчи келиб, аудитдан ўтказишини кутиб ўтиради. Энди бу жараён ҳам соддалаштирилади. Охирги уч йиллик айланмаси 10 миллиард сўмдан ошмаган, солиқдан қарзи бўлмаган корхонани ихтиёрий тугатишда текширув ўтказилмайди.
Эндиликда кичик ва ўрта бизнесга қўшимча талаб ва мажбурият юклайдиган норматив ҳужжатлар қабул қилишга ҳам уч йиллик мораторий эълон қилинади.
Давлат раҳбари тадбиркорлардан бир нарсада кўнгиллари тўқ бўлишини айтди: “Президент доимо сизларга энг яқин кўмакчи, таянч ва суянч бўлади. Сизлар янгилик қилишдан чарчаманглар, мен қўллаб-қувватлашдан чарчамайман”.
Изоҳ (0)