Soliq, bojxona, bank xodimlari, hokim o‘rinbosari va tadbirkorlardan iborat uyushgan jinoiy guruh byudjetning 24,5 milliard so‘mini talon-toroj qilgani aniqlandi.
Davlat xavfsizlik xizmati xodimlari tomonidan iqtisodiy jinoyatlarga qarshi kurashish yo‘nalishida olib borilgan tezkor-qidiruv tadbirlari natijasida 17 nafar soliq idoralari xodimlari, 1 nafar bojxona organi xodimi, 1 nafar bank xodimi, 1 nafar tuman hokimining birinchi o‘rinbosari va 18 nafar tadbirkorlik subyektlarining mansabdor shaxslaridan iborat uyushgan jinoiy guruh faoliyati fosh etildi.
Aniqlanishicha, ushbu guruh tomonidan 2020—2023-yillar davomida 8 ta soxta korxona tashkil qilinib, xorijga soxta eksport qilingan mebel mahsulotlari uchun qaytarilishi belgilangan 15 foiz qo‘shilgan qiymat solig‘ining (QQS) salbiy farq summasini asossiz qaytarib olish orqali ular jami 24 milliard 580 million so‘m byudjet mablag‘larini talon-toroj qigan.
Jinoiy guruh faoliyatini soliq idoralarining sobiq xodimi muvofiqlashtirib borgan va aynan mazkur shaxs norasmiy rahbarlik qilgan korxonalar Namangan viloyati Yangiqo‘rg‘on tumanida ro‘yxatdan o‘tgan bo‘lsa-da, ularning yuridik manzillari asossiz ravishda tez-tez o‘zgartirilib, ularga rasmiy rahbar sifatida ishga aloqador bo‘lmagan shaxslarning nomlari kiritilgan. Shuningdek, korxonalarning faoliyat turi sifatida mebel ishlab chiqarish bilan shug‘ullanish belgilangan bo‘lsa-da, aslida ular hech qanday ishlab chiqarishni amalga oshirishmagan.
Bundan tashqari, hisobot hujjatlarida go‘yoki ishlab chiqarilgan tayyor mahsulotlar Qirg‘izistonga eksport qilingani aks ettirilgan. Lekin tekshiruvlar jarayonida eksport operatsiyalari amalga oshirilmagani, korxonalarning muhrlari uyushgan guruh tomonidan soxtalashtirilgani va eksport shartnomalari shakllantirilgani hamda davlat byudjetidan yuqorida ko‘rsatilgan qo‘shilgan qiymat solig‘i pul mablag‘lari noqonuniy qaytarib olingani aniqlandi.
Holat yuzasidan Jinoyat kodeksining 167, 179, 184, 209 va 228-moddalari bilan jinoyat ishi qo‘zg‘atilib, tergov harakatlari olib borildi.
Tergov davomida 6 milliard 808 million so‘m davlat hisobiga undirildi. Shuningdek, yetkazilgan zararni qoplash uchun 6 mlrd 300 mln so‘mlik mol-mulk, jumladan, 1 ta ko‘p qavatli xususiy tibbiy klinika binosi, 1 ta avtomobillar yuvish shoxobchasi, 2 ta xonadon, 6 ta avtomashina hamda telefon va kompyuter jihozlari xatlandi.
Jinoyat ishlari bo‘yicha Mirzo Ulug‘bek tuman sudi tomonidan 38 nafar sudlanuvchining 14 nafariga 5 yil-u 6 oydan 7 yil-u 6 oy muddatgacha ozodlikdan mahrum qilish jazosi tayinlandi. Shuningdek, 18 nafar shaxsga nisbatan turli muddatlarga ozodlikdan mahrum qilish jazosi tayinlanib, ularga Jinoyat kodeksining 72-moddasini qo‘llagan holda 2 yil muddat ichida yetkazilgan moddiy zararni qoplash majburiyati bilan 3 yil sinov muddati tayinlandi.
Bundan tashqari, sudlanuvchilarning 6 nafariga nisbatan 2 yildan kam bo‘lmagan muddatga ozodlikni cheklash jazosi tayinlandi.
Izoh (0)