Istanbulda Rossiya va AQSH delegatsiyalarining ikki tomonlama munosabatlardagi “muammoli masalalar” va ikki davlat elchixonalari faoliyatini tiklash bo‘yicha muzokaralari yakunlandi. Ular deyarli olti yarim soat davom etdi.
Muzokaralar ertalab soat o‘nga yaqin Bosfor qirg‘og‘idagi Arnavutko‘y tumanidagi AQSH bosh konsulining qarorgohida boshlandi. Rossiya delegatsiyasi muzokaralar o‘tkazilgan qarorgoh hududini Toshkent vaqti bilan soat 18:20 da tark etdi.
Delegatsiyalar tarkibi oshkor qilinmadi. Rossiya TIV rasmiy vakili Mariya Zaxarovaning aytishicha, uchrashuvda Rossiya–Amerika munosabatlari uchun mas’ul bo‘lgan diplomatlar ishtirok etgan. Rossiya tashqi ishlar vaziri Sergey Lavrov muzokaralarda “yuqori darajadagi diplomatlar va ekspertlar” qatnashayotganini ta’kidladi.
Uchrashuv arafasida Lavrov uchrashuv yakunlari bo‘yicha Rossiya–AQSH munosabatlari “qanchalik tez va samarali” rivojlanishi mumkinligini aytdi. Rossiya va AQSH tomonlari muhokama qilishni rejalashtirgan masalalar orasida xodimlar soni va vizalarni rasmiylashtirish, shuningdek, diplomatlarning ishlashi uchun zarur bo‘lgan bank operatsiyalari bor edi.
Turkiyadagi uchrashuvdan oldin Moskva va Vashington o‘rtasida ikkita dastlabki texnik aloqa o‘rnatildi. Tomonlar joriy yilning 18-fevral kuni Ar-Riyodda bo‘lib o‘tgan muzokaralarda o‘z diplomatik vakolatxonalari shtatlarini tiklash zarurligi to‘g‘risida kelishib oldilar. Xususan, Lavrovning ma’lum qilishicha, Rossiya va AQSH tez orada Moskva va Vashingtonga elchilar tayinlanishini ta’minlashga kelishib olgan.
AQSHning Rossiyadagi vakolatxonalari xodimlari soni 2021-yil aprel oyida prezident Vladimir Putin do‘stona bo‘lmagan davlatlar diplomatik idoralari faoliyatini cheklash to‘g‘risidagi farmonni imzolaganidan beri rejali ravishda qisqartirilgan edi. Ular orasida AQSH ham bo‘lgan. Bunga javoban AQSH elchixonasi rossiyaliklarga xizmatlarni chekladi.
Izoh (0)