Ranking prognozlariga ko‘ra, 2025-yilda dunyo bo‘yicha 63,1 million kishi vafot etishi mumkin.
2024-yilda jahonda 62,4 million kishi vafot etdi, Bu 2023-yilga nisbatan 1,2 foizga ko‘p (61,7 million kishi). Prognozlarga ko‘ra, 2025-yilda yillik o‘sish sur’ati 1,2 foizni tashkil etgan holda o‘limlar soni 63,1 millionga yetishi kutilmoqda.
Mamlakatlar kesimida olganda O‘zbekistonda o‘limlar soni 2025-yilda 223,9 ming kishini tashkil etishi taxmin qilinmoqda.
Prognozlariga ko‘ra, MDH mamlakatlari orasida eng ko‘p o‘lim Rossiyada qayd etiladi: 1,9 million kishi. Undan keyingi o‘rinlarda Ukraina (520,2 ming kishi), Qozog‘iston (140,6 ming kishi), Belarus (119,1 ming kishi), Ozarbayjon (70,1 ming kishi), Turkmaniston (44,8 ming kishi), Qirg‘iziston (44,1 ming kishi), Moldova (42 ming kishi) va Armaniston (27,7 ming kishi).
Makromintaqalar kesimida eng ko‘p o‘lim Osiyoda bo‘lishi kutilmoqda: 34,7 million kishi. Ikkinchi o‘rinda Afrika (11,7 million kishi), uchinchi o‘rinda Yevropa (8,5 million kishi) bo‘ladi. Amerikada 7,9 million, Okeaniyada esa 317,8 ming o‘lim kutilmoqda.
Prognozlarga ko‘ra, 2025-yilda 34,1 million nafar erkak va 29,1 million nafar ayol vafot etadi. Erkaklarning taxminiy o‘lim ko‘rsatkichi ayollarga nisbatan 17,3 foizdan ortiq bo‘lmoqda.
Olimlarning taxminiga ko‘ra, 2100-yilga borib dunyoda vafot etganlar soni 122,9 million kishiga yetadi. Bu 2024-yildagi ko‘rsatkichdan 97 foizga ko‘pdir.
Ayni paytda O‘zbekistonda doimiy aholi soni 37,5 million kishidan oshdi. Statistika agentligi ma’lumotlariga ko‘ra, O‘zbekistonda o‘rtacha umr ko‘rish davomiyligi 74,3 yoshni tashkil etadi. Mamlakatda o‘lim holatlarining yarmidan ko‘pi qon aylanish tizimi kasalliklari sabab yuz bermoqda.
Izoh (0)