2023-yilda Xitoy aholisi 2,08 million kishiga yoki 0,2 foizga kamayib, 1,409 milliardga tushdi. Xitoy Xalq Respublikasi Davlat statistika boshqarmasining yillik hisobotida maʼlum qilinishicha, o‘tgan yili mamlakatda avvalgi yilga nisbatan 5,7 foizga kam bola tug‘ilgan: 9,02 million. Shu bilan birga, tug‘ilish rekord darajada pastligicha qolmoqda — 1 000 kishiga 6,39 ta.
Hisobotda, shuningdek, 2023-yilda vafot etganlar soni 2022-yilga nisbatan 6,6 foizga oshgani ko‘rsatilgan. O‘tgan yili mamlakatda 11,1 million kishi vafot etdi va o‘lim darajasi, ya’ni har 1 ming aholiga to‘g‘ri keladigan o‘lim soni 7,87 ni tashkil etdi, bu 1974-yildan beri eng yuqori ko‘rsatkichdir.
Aholining tabiiy o‘sishi 1 ming kishiga minus 1,48 ni tashkil etgan. Statistik ma’lumotlarga ko‘ra, Xitoy aholisining 720,3 millionini erkaklar, 689,35 millionini ayollar tashkil qiladi. Aholining eng katta ulushini 16 yoshdan 59 yoshgacha bo‘lganlar – 61,3 foiz yoki 864,8 million kishi tashkil etadi. Yil davomida shaharlar aholisi 11,96 millionga oshib, 932,67 millionga yetgan, qishloq joylarda doimiy aholi soni esa 14,4 million kishiga kamayib, 477 millionga tushgan.
Xitoy aholisi ketma-ket ikkinchi yil kamayib bormoqda
2022-yilda 1961-yildan buyon birinchi marta aholi sonida qisqarish qayd etilgandi. 2023-yilda tug‘ilishni oshirish bo‘yicha milliy va mintaqaviy hokimiyat organlari tomonidan ko‘rilgan ko‘plab chora-tadbirlar sezilarli natijalarni bermadi. Avvalroq Xitoy Fanlar akademiyasi tomonidan e’lon qilingan prognozda agar tug‘ilishning hozirgi past tendensiyasi davom etsa, 2035-yilga kelib mamlakat pensiya tizimi mablag‘siz qolishi aytilgan. O‘sha paytga kelib, 60 — pensiya yoshidan oshganlar 280 milliondan 400 millionga ko‘tariladi.
Xitoydagi ayrim ekspertlar tug‘ilish darajasi 2024-yilda ko‘tarilishi mumkin, deb umid qilmoqda, chunki COVID-19 pandemiyasining tugashi tegishli bumni keltirib chiqarishi kerak. Bundan tashqari, Xitoyda an’anaviy ravishda Ajdaho yilida ko‘proq bolalar tug‘iladi, deb xabar bermoqda ba’zi Xitoy ommaviy axborot vositalari.
Izoh (0)