Rossiya statistika agentligi (Rosstat) birinchi marta rossiyaliklarning tashqi sabablardan o‘lim statistikasini yashirdi, deya Deutsche Welle xabar berdi.
Demograf Aleksey Rakshaning ta’kidlashicha, 12-iyulda eʼlon qilingan yillik statistik maʼlumotlardan tashqi sabablarga ko‘ra halok bo‘lganlar soni va o‘lim holatlari bo‘yicha batafsil maʼlumotlarni o‘z ichiga olgan ikkita jadval olib tashlangan.
Statistik ma’lumotlar Rossiya aholisining mintaqalar bo‘yicha o‘tgan yildagi tabiiy harakatini hisobga oladi. Xabarga ko‘ra, vafot etganlarni yosh bo‘yicha hisobga oluvchi jadvalda o‘lim sabablarining asosiy toifalari olib tashlangan, ma’lumotlar ta’lim darajasi bo‘yicha taqsimlangan.
Rosstat statistikasidagi tashqi sabablar kasalliklardan emas, balki yo‘l-transport hodisalari, qotilliklar va o‘z joniga qasd qilish natijasida kelib chiqqan o‘limlarni o‘z ichiga oladi. Rossiya-Ukraina urushi boshlanganidan so‘ng, bu ma’lumotlar mustaqil jurnalistlar uchun urushda halok bo‘lgan ruslar sonini taxmin qilish usullaridan biriga aylangan edi, deyiladi xabarda.
Mustaqil jurnalistlarning hisob-kitoblari
“Muhim hikoyalar” mustaqil tadqiqot internet-nashri 2022-yilda tashqi sabablarga ko‘ra ayollar o‘limi kamayganini, erkaklar o‘limi esa oshganini ta’kidlagan, unga ko‘ra, tinchlik davrida erkaklar va ayollar o‘limi tendensiyalari farq qilmagan. Mazkur statistika Rossiya-Ukraina urushi boshlanganidan keyin tashqi sabablardan o‘lganlar soni rus armiyasining yo‘qotishlarini taxmin qilish imkonini bergan.
2023-yil iyul oyida “Muhim hikoyalar” tashqi sabablar tufayli o‘lim bo‘yicha statistik ma’lumotlardan foydalangan holda, Ukrainadagi urushda Rossiya armiyasining yo‘qotishlarini kamida 18 ming nafar kishiga baholagan. Mediazona va BBC nashrlari hisoblashicha, 5-iyul holatiga ko‘ra, Rossiya yo‘qotishlari 58 207 nafar kishini tashkil etgan.
Meduza va Mediazona nashrlari Rosstat maʼlumotlaridan foydalangan holda taqdim etgan hisob-kitoblarga ko‘ra, 2023-yilda erkaklar o‘limi 2022-yilga qaraganda deyarli ikki baravarga oshgan. O‘lganlar sonini, shuningdek, Meros ishlari reyestri ma’lumotlari asosida o‘tkazilgan tadqiqotlar orqali ham aniqlash mumkin. Ushbu hisob-kitoblarga ko‘ra, 2022-yildan beri urushda 120 mingga yaqin rus harbiy xizmatchilari halok bo‘lgan.
Izoh (0)