O‘zbekistonda 2022-yildagi o‘limlarning yarmiga qon aylanish tizimidagi kasalliklar sabab bo‘lgan — Statistika

O‘zbekistonda 2022-yilda 172,1 ming nafar odam vafot etdi. Bu haqda Statistika agentligidan ma’lum bo‘ldi. 

2022-yilda qayd etilgan o‘limlar soni so‘nggi ikki yildagi eng past ko‘rsatkich bo‘ldi. 2020 va 2021-yillarda mos ravishda 175,6 mingta va 174,5 mingta o‘lim holati kuzatilgandi.

Vafot etganlarning 95 ming nafari erkaklar bo‘lsa, 77,1 ming nafarini ayollar tashkil qilgan. Shuningdek, shahar joylarda 92 ming kishi, qishloq joylarda 80,1 ming kishi o‘lgan. 

Statistika agentligi o‘limlarning asosiy sababi sifatida qon aylanish tizimidagi kasalliklarni qayd etgan. Ushbu sabab bilan 95,5 ming kishi vafot etgan. Bu 2022-yildagi jami o‘limlarning 55,5 foizini tashkil qiladi. 

Ma’lumot uchun, O‘zbekistonda 1,2 mln kishida qon aylanish tizimi kasalliklari mavjud. 

2022-yilda o‘lganlar yosh guruhlari bo‘yicha taqsimlanganda, 20 yoshgacha vafot etganlar 20 foizni, 20-59 yoshlar orasida 24,6 foizni, 60 va undan katta yoshlilarda esa 55,4 foizni tashkil etgan.

So‘nggi 5 yil davomida qayd etilgan vafot etganlar soni ko‘rsatkichi oylar kesimida tahlil etilganda, nisbatan kam vafot etganlar soni yanvar va sentabr oylarida, eng ko‘p vafot etganlar soni esa iyul—avgust oylarida qayd etilganligi kuzatildi.