Farg‘ona viloyati Qo‘shtepa tumanida ikki tup noqonuniy kesilgan daraxt evaziga 223 tup daraxt ekib berildi. Bu haqda viloyat Ekologiya boshqarmasi xabar berdi.
Unga ko‘ra, “G‘ishtmon” MFYdagi “Otalar oromgohi” hududida bir tup chinor va bir tup tol daraxtlari shu mahallaning Yangiariq ko‘chasi 121-uyda yashovchi fuqaro S.M. tomonidan o‘zboshimchalik bilan hech qanday ruxsatnomasiz tagidan kesib yuborilgan bo‘lgan.
Unga nisbatan Ma’muriy javobgarlik to‘g‘risidagi kodeksning 79-modda 1-qismi bilan ma’muriy bayonnoma rasmiylashtirilib, tegishli tartibda jarima belgilanib, o‘simlik dunyosiga yetkazilgan zarar hisoblangan.
Bugun 2 tup daraxtlarni noqonuniy kesib, o‘simlik dunyosiga zarar yetkazgan fuqaro “G‘ishtmon” MFYdagi mahalla guzariga kompensatsiya sifatida 23 tup pavlovniya, 30 tup archa, 100 tup tok hamda 70 tup mevali, jami, 223 tup daraxt ko‘chatlari ekib berdi.
Ayovsiz kesilayotgan daraxtlar
Toshkent viloyatida 2 tup ko‘p yillik chinorni kesgan shaxs tabiatga 199 mln so‘m zarar yetkazgani haqida xabar berilgandi. Xorazmda 4 tup pavlovniya daraxtini kesgan shaxs 27 mln so‘mdan ortiq jarimaga tortilgandi.
Shuningdek, Surxondaryoda avtomobil yo‘llarini rekonstruksiya qilishda qariyb 9,5 ming tup daraxt ko‘chirilishi mumkinligi aytilgandi. Shu bilan birga, Toshkent viloyatida 4 tup yong‘oq daraxtini kesgan shaxs tabiatga 247 mln so‘m zarar yetkazgandi.
Bundan tashqari, Jizzaxda tut daraxtlari kesilishi oqibatida o‘simlik dunyosiga 738 mln so‘mlik zarar yetkazilgan.
Jizzax viloyatida esa 19 tup daraxt kesilishi oqibatida tabiatga 435 mln so‘mlik zarar yetkazilgani xabar qilingandi.
Bu bo‘yicha qonun
O‘zbekistonda daraxt kesganlik uchun jazo choralarini kuchaytirish ko‘zda tutilgan qonun 2024-yil 1-martdan kuchga kirgan.
Unga ko‘ra daraxtlar, butalar, boshqa o‘simliklar va nihollar qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazganlik uchun:
- fuqarolar BHMning 25 baravaridan 50 baravarigacha — 8 million 500 ming so‘mdan 17 million so‘mgacha (shu paytga qadar BHMning 5 baravaridan 10 baravarigacha edi),
- mansabdorlar BHMning 50 baravaridan 75 baravarigacha, ya’ni 17 million so‘mdan 25 million 500 ming so‘mgacha (shu paytga qadar BHMning 10 baravaridan 15 baravarigacha) jarimaga tortiladi.
O‘zbekistonda noqonuniy daraxt kesishga doir moratoriy joriy etilgunga qadar bo‘lgan davrga nisbatan bu kabi qonunbuzarliklar 60 foizga kamaygan. 2025-yilning o‘tgan davrida respublika bo‘yicha 848 tup daraxt noqonuniy kesilib, tabiatga jiddiy ziyon yetkazilgan. Har bir holatda aybdor shaxslarga nisbatan qonunga muvofiq jazo choralari qo‘llanilgan.
Izoh (0)