Фарғона вилояти Қўштепа туманида икки туп ноқонуний кесилган дарахт эвазига 223 туп дарахт экиб берилди. Бу ҳақда вилоят Экология бошқармаси хабар берди.
Унга кўра, “Ғиштмон” МФЙдаги “Оталар оромгоҳи” ҳудудида бир туп чинор ва бир туп тол дарахтлари шу маҳалланинг Янгиариқ кўчаси 121-уйда яшовчи фуқаро С.М. томонидан ўзбошимчалик билан ҳеч қандай рухсатномасиз тагидан кесиб юборилган бўлган.
Унга нисбатан Маъмурий жавобгарлик тўғрисидаги кодекснинг 79-модда 1-қисми билан маъмурий баённома расмийлаштирилиб, тегишли тартибда жарима белгиланиб, ўсимлик дунёсига етказилган зарар ҳисобланган.
Бугун 2 туп дарахтларни ноқонуний кесиб, ўсимлик дунёсига зарар етказган фуқаро “Ғиштмон” МФЙдаги маҳалла гузарига компенсация сифатида 23 туп павловния, 30 туп арча, 100 туп ток ҳамда 70 туп мевали, жами, 223 туп дарахт кўчатлари экиб берди.
Аёвсиз кесилаётган дарахтлар
Тошкент вилоятида 2 туп кўп йиллик чинорни кесган шахс табиатга 199 млн сўм зарар етказгани ҳақида хабар берилганди. Хоразмда 4 туп павловния дарахтини кесган шахс 27 млн сўмдан ортиқ жаримага тортилганди.
Шунингдек, Сурхондарёда автомобиль йўлларини реконструкция қилишда қарийб 9,5 минг туп дарахт кўчирилиши мумкинлиги айтилганди. Шу билан бирга, Тошкент вилоятида 4 туп ёнғоқ дарахтини кесган шахс табиатга 247 млн сўм зарар етказганди.
Бундан ташқари, Жиззахда тут дарахтлари кесилиши оқибатида ўсимлик дунёсига 738 млн сўмлик зарар етказилган.
Жиззах вилоятида эса 19 туп дарахт кесилиши оқибатида табиатга 435 млн сўмлик зарар етказилгани хабар қилинганди.
Бу бўйича қонун
Ўзбекистонда дарахт кесганлик учун жазо чораларини кучайтириш кўзда тутилган қонун 2024 йил 1 мартдан кучга кирган.
Унга кўра дарахтлар, буталар, бошқа ўсимликлар ва ниҳоллар қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказганлик учун:
- фуқаролар БҲМнинг 25 бараваридан 50 бараваригача — 8 миллион 500 минг сўмдан 17 миллион сўмгача (шу пайтга қадар БҲМнинг 5 бараваридан 10 бараваригача эди),
- мансабдорлар БҲМнинг 50 бараваридан 75 бараваригача, яъни 17 миллион сўмдан 25 миллион 500 минг сўмгача (шу пайтга қадар БҲМнинг 10 бараваридан 15 бараваригача) жаримага тортилади.
Ўзбекистонда ноқонуний дарахт кесишга доир мораторий жорий этилгунга қадар бўлган даврга нисбатан бу каби қонунбузарликлар 60 фоизга камайган. 2025 йилнинг ўтган даврида республика бўйича 848 туп дарахт ноқонуний кесилиб, табиатга жиддий зиён етказилган. Ҳар бир ҳолатда айбдор шахсларга нисбатан қонунга мувофиқ жазо чоралари қўлланилган.
Изоҳ (0)