Toshkentda 9-noyabr kuni “Yashil shahar” kuni o‘tkaziladi.
Poytaxt hokimligi matbuot xizmati barcha tashkilotlar, korxonalar hamda faol fuqarolarni daraxt ekish tashabbusiga qo‘shilishga chaqirdi. Fuqarolar daraxtlarni o‘zlari xohlagan joyda — uy hovlisida, korxona hududida yoki hokimlikka murojaat qilib, boshqa tavsiya etilgan maqbul joylarda ekishi mumkin.
Xabarda ta’kidlanishicha, poytaxtning iqlim sharoiti va mavsumiy xususiyatlarini inobatga olgan holda, yagona ekotizimni saqlash uchun, mutaxassislar daraxtlarning yaxshi ildiz otishi uchun qalamchalar o‘rniga 2 yoshdan katta ko‘chatlarni ekishni va sug‘orish tizimi mavjud joylarni tanlashni tavsiya etadi.
Mintaqada tarixan o‘zini yaxshi ko‘rsatgan manzarali daraxtlarning quyidagi turlariga e’tibor qaratish so‘raldi: chinor lola daraxti lipa katalpa, zarang, qayrag‘och, eman, oq/pushti akatsiya.
Oliy Majlis Senatining iyul oyida bo‘lib o‘tgan yalpi majlisida parlament nazorati doirasida Toshkent shahrida tadbirkorlikni rivojlantirish va ekologik vaziyatni yaxshilash yuzasidan amalga oshirilgan ishlar holati ko‘rib chiqilgandi.
Unda aytilishicha, ekologik vaziyatni yaxshilash yuzasidan “Yashil makon” umummilliy loyihasining bahorgi ko‘chat ekish mavsumi doirasida Toshkent shahrida 700 ming donaga yaqin manzarali, mevali daraxt va buta ko‘chatlari va qalamchalari ekilgan. Shu bilan birga daraxtlarning noqonuniy kesilishi bilan bog‘liq 87 ta holat aniqlanib, tabiatga jami 817,3 million so‘m zarar yetkazilgan.
“Yashil makon” dasturi uchun 2025-yilda 100 milliard so‘m ajratilishi rejalashtirilgan.
Izoh (0)