O‘zbekistonga Qirg‘izistondan 5,2 milliard so‘mlik tilla buyumlarni noqonuniy olib kelgan shaxs ushlandi. Bu haqda Davlat xavfsizlik xizmati xabar berdi.
DXXning Andijon va Farg‘ona viloyatlari bo‘yicha boshqarmalari xodimlari tomonidan tezkor tadbir o‘tkazilgan. Qirg‘izistondan “Vodil avto” chegara bojxona posti orqali Farg‘ona viloyati hududiga o‘tgan vaqtida Andijon shahrida yashovchi, 1992-yilda tug‘ilgan fuqaro to‘xtatilib, o‘rnatilgan tartibda tekshirilganda uning egnidagi kiyimlari ostiga yashirgan holda, jami 859 dona zargarlik buyumlari va 1 dona qo‘l soatini qo‘shni davlatdan olib kelgani aniqlangan.
Ekspertlar xulosasiga ko‘ra, kimyoviy tarkibi oltin hisoblangan, brilliant toshlari bilan bezak berilgan mazkur zargarlik buyumlarining sof og‘irligi 4 kilo 155 gramm bo‘lib, umumiy bahosi 5 milliard 213 million so‘mni tashkil etadi.
Aniqlanishicha, Andijon va Farg‘ona viloyatlarida yashovchi 10 nafarga yaqin savdogar tomonidan Turkiyadan Qirg‘izistonga olib kelingan ushbu zargarlik buyumlarini mazkur shaxs 400 AQSH dollari xizmat haqi evaziga chegara bojxona postidan o‘tkazib berishi kerak bo‘lgan.
Hozirda unga nisbatan Jinoyat kodeksining 182-moddasi 2-qismi “a” bandi bilan jinoyat ishi qo‘zg‘atilgan. Ushbu moddaga ko‘ra, bojxona to‘g‘risidagi qonunchilikni buzish (juda ko‘p miqdorda) BHMning 300 baravaridan 600 baravarigacha miqdorda jarima yoki 3 yilgacha axloq tuzatish ishlari yoxud 5 yildan 8 yilgacha ozodlikdan mahrum qilish bilan jazolanadi.
Ayni paytda qimmatbaho buyumlar egalarining shaxsiga aniqlik kiritilmoqda.
2025-yilning boshlarida “Farg‘ona aeroporti” chegara bojxona posti xodimlari tomonidan 483 mln so‘mlik zargarlik buyumlarini yashirib olib kirilishiga chek qo‘yilgandi. Bojxona qo‘mitasi ma’lumotlariga ko‘ra, noqonuniy muomaladan olib qo‘yilgan valyuta qimmatliklari o‘tgan yilning shu davriga nisbatan 3 barobarga, zargarlik buyumlari esa qariyb 2 barobarga ortgan.
Izoh (0)