Namanganda 2022-yil davomida qarzdorlardan jami 104 milliard so‘m aliment pullari undirildi. Bu haqda MIB viloyat boshqarmasi boshlig‘i Behzod Mirzaahmedov maʼlum qildi, deya xabar beradi “Daryo” muxbiri Azizbek Abduvaliyev.
Aliment to‘lashdan bo‘yin tovlagan 851 kishiga nisbatan maʼmuriy, 63 nafar qarzdorga nisbatan esa jinoyat ishlari qo‘zg‘atildi.
2022-yil mart oyida “Aliment to‘lovlari” davlat maqsadli jamg‘armasi tashkil etilib, unga MIB rivojlantirish jamg‘armasi mablag‘laridan respublika bo‘yicha 50 milliard so‘m ajratilgandi. Viloyatda mazkur jamg‘arma hisobidan voyaga yetmagan farzandini moddiy taʼminlashdan bo‘yin tovlaganlik uchun jinoiy javobgarlikka tortilganlardan 8 nafarining oilasiga 209 million so‘m to‘lab berildi.
“Qarzdorlardan biri ikki nafar voyaga yetmagan farzandining moddiy taʼminoti uchun aliment to‘lovlarini to‘lamaganligi bois dastlab maʼmuriy jazoga tortilgandi. Shundan so‘ng ham xulosa chiqarmaganligi uchun jinoyat ishlari bo‘yicha To‘raqo‘rg‘on tuman sudi hukmiga asosan aybli deb topilib, yetkazilgan 45,9 million so‘m miqdoridagi zarar undirishi belgilangan. Aynan yangi tashkil etilgan jamg‘arma hisobidan aliment to‘lovi undiruvchi nomiga ochilgan plastik kartaga o‘tkazib berildi”, —deydi boshqarma katta inspektori Azimjon Boydedayev.
Maʼlumot uchun, 2022-yilda MIB Namangan viloyat boshqarmasi tomonidan 2349 nafar ishsiz aliment to‘lovchining bandigini taʼminlashga erishildi.
Izoh (1)
Assalomu aleykum. Undirgani yaxshiku lekin, ayollarga erkaklarni dodlatib undirilayotgan puli asosan moddiy ehtiyoj emas erkaklarga jazo bõlib qolmayaptimikin. Ayrim ayollar ajrashidan qõrqmaydi. Chunki davlat bularga keng imkoniyatlar berib qõyibti. Ayol nohaq bõlsa hamki, ayol õzi xoxlab (yoki shantaj yõli bilan) ajrashadi lekin erkak jabrini kõradi. Aliment belgilash, tõlash kabi masalalar bizda bir tomonlama. Erkakni himoya qiladigan tizim umuman yõq. Agar erkaklarni ham himoya qilinadigan biror norma yoki qonun bõlganida, oilalar ajrimi bundan kamroq bõlardi