Farg‘ona viloyati O‘zbekiston tumanida aliment to‘lamay yurgan erkak boshqa xotinining uyidan, yotoqxonadan mast holda topildi. Bu haqda MIB axborot xizmati “Daryo”ga xabar berdi.
Ma’lum qilinishicha, fuqarolik ishlari bo‘yicha O‘zbekiston tumanlararo sudining 2011-yildagi sud buyrug‘iga asosan qarzdor erkak undiruvchi sobiq ayoli foydasiga voyaga yetmagan bir nafar farzandi uchun aliment undirishi belgilangan. Ammo er aliment pullarini o‘z vaqtida to‘lashi to‘g‘risida ogohlantirilgan bo‘lsa-da, to‘lamasdan kelgan.
Shundan so‘ng davlat ijrochisi qarzdorning yashash uyiga bir necha marotaba borgan. Uni topish imkoni bo‘lmagani sababli unga nisbatan qidiruv e’lon qilingan. Boshqarma qidiruv sho‘basi xodimlari 18-aprel kuni qarzdorning ijro hujjatida ko‘rsatilgan manziliga borgan.
Qarzdorning yashash xonadonidagi barcha joylar ko‘zdan kechirildi, tadbir jarayonida nikohidagi ayolining uyida ekani aniqlanib, xonadonga kirilganda, uning yotoqxonada mast holatda ekani ma’lum bo‘lgan.
Shu kunning o‘zida qarzdor mavjud 33 million 405 ming so‘m aliment qarzdorligini to‘lamagani sababli Jinoyat ishlari bo‘yicha Furqat tuman sudi tomonidan unga nisbatan 15 sutka ma’muriy qamoq jazosi tayinlandi.
Alimentdan qochgan otalar haqida
Namangan viloyati Chortoq tumanida aliment to‘lashdan qochib yurgan erkak uy yerto‘lasidan topilgandi. Qarzdor ota tomonidan qarzdorlik 20 million so‘mdan ortgan. Ishlash maqsadida Toshkent shahriga ketgach, unga nisbatan qidiruv eʼlon qilingan. Xodimlar tomonidan Toshkentdagi xonadon yashash joylari puxta ko‘zdan kechirilganda, yerto‘laga yashirinib olgani aniqlangan. Unga nisbatan 15 sutkalik maʼmuriy qamoq jazosi tayinlangan.
Qashqadaryo viloyati Yakkabog‘ tumanida aliment to‘lamay qochib yurgan erkak Toshkentdagi molxonadan topilgan. Voyaga yetmagan farzandlari uchun to‘lanmagan aliment miqdori 3 million 200 ming so‘m ekani aytilgan.
Shuningdek, Namangan viloyati Chust tumanida aliment to‘lashdan qochib yurgan erkak Ohangarondan topilgan.O‘tkazilgan suhbat mobaynida qarzdorlik salkam 15 million so‘mga yetgani, uni bartaraf etish lozimligi tushuntirilgan. Qayd etilishicha, u yana mas’uliyatni his etmagan va unga nisbatan jinoyat ishi yuritilgan.
Andijon viloyati Shahrixon tumanida esa aliment to‘lashdan qochib, uyining yerto‘lasida yashirinib yurgan erkak ushlanib, 15 sutkaga qamalgan.
Eng antiqa holatlardan biri, Namangan viloyatida aliment to‘lamay yurgan erkak boshqa xotinining uyida yashiringani aniqlangan. Unda qarzdorlik to‘planib, 24,3 million so‘mga borib yetgan edi.
Shu kabi, Qashqadaryoda MIB xodimi 2 yildan beri qidiruvda bo‘lgan qarzdor erkakni berkinayotgan joyida topib olgan. Tadbir jarayonida xodimlardan biri uyning boloxonasi va tomini tekshirayotgan paytda, ikkinchi xodim yiqitilgan ko‘rpalar tagidan fuqaroni olib chiqdi.
Shu kunning o‘zida qarzdor mavjud 28 million 971 ming so‘m aliment qarzdorligini to‘lamagani sababli Jinoyat ishlari bo‘yicha Yakkabog‘ tuman sudi tomonidan B.Buxarovga nisbatan 15 sutka ma’muriy qamoq jazosi tayinlangan.
Surxondaryo viloyati Angor tumanida aliment to‘lamay, 2 yildan buyon qidiruvda bo‘lgan erkak uy yerto‘lasidan topilgan.
Toshkentda uchta xotiniga aliment to‘lamagan erkakning qarzini 4-xotini to‘lagani haqidagi holat ham kuzatilgan. Shundan so‘ng sud tomonidan qarzdorga nisbatan to‘plangan hujjatlar qayta ko‘rilib, yetkazilgan zarar miqdori qoplangani sababli 15 sutkalik qamoq jazosini to‘liq o‘tamasdan ozod qilingan.
Izoh (0)