Rossiyaning Kaliningrad viloyati to‘liq NATOga a’zo davlatlar bilan o‘ralgan bo‘lib, alyans uni “misli ko‘rilmagan tezlikda va muddatda” egallab olish imkoniyatiga ega. Bu haqda AQSHning Yevropa va Afrikadagi quruqlikdagi kuchlari qo‘mondoni general Kristofer Donaxyu xabar berdi.
AQSH armiyasi va uning NATOdagi ittifoqchilari “Sharqiy qanotdagi tiyib turish chizig‘i” deb nomlangan yangi rejani amalga oshirishga kirishmoqda. Rejaning asosiy maqsadi — quruqlikdagi harbiy imkoniyatlarni kuchaytirish va alyans doirasida harbiy-sanoat muvofiqligini ta’minlashdir.
General Donaxyu misol sifatida Kaliningrad viloyatini tilga oldi. Uning aytishicha, bu hudud taxminan 75 kilometr kenglikda bo‘lib, to‘liq NATO davlatlari bilan chegaradosh. Shu sababli armiya va uning ittifoqchilari “shaharni ilgari hech qachon bo‘lmagan tezlikda egallab olish imkoniga ega”.
Biz bu rejani allaqachon ishlab chiqdik. Rossiya bizga massa va impuls nuqtayi nazaridan muammo tug‘dirmoqda, biroq biz bu tahdidni to‘xtatish uchun kerakli imkoniyatlarni shakllantirdik, dedi general Donaxyu.
Uning aytishicha, mintaqaviy rejalashtirish ishlari ancha vaqtdan beri olib borilmoqda. Biroq hozircha NATO bilan hamkorlikda e’tibor, asosan, Boltiqbo‘yi mamlakatlariga qaratilgan. Bu esa sanoat sohasi va hukumatlar uchun zarur talablarni aniqlashtirish maqsadida amalga oshirilmoqda.
Rossiya tahdidlariga qarshi chora ko‘rish va global tiyib turish tizimini yaratish doirasida AQSH armiyasi va NATO hozirda ma’lumotlarga asoslangan yagona tizimlar, qo‘shma uchirish platformalari va “bulutli koordinatsiya” texnologiyalarini shoshilinch ishlab chiqmoqda.
Biz bularning barchasi Ukrainada qanday ishlayotganini allaqachon kuzatyapmiz. A2AD (kirish va harakatni cheklovchi) zonalarini quruqlikdan yo‘q qilishni o‘rgandik va endi bu tajribani boshqa yo‘nalishlarda ham qo‘llay olamiz, deya ta’kidladi general.
Reja doirasida ma’lumotlar almashinuvi tizimi ham joriy etilgan. Donaxyuning ta’kidlashicha, NATO allaqachon bu tizimni xarid qilgan — u Palantir kompaniyasining sun’iy intellektga asoslangan Maven Smart System platformasini nazarda tutmoqda. Ushbu tizim katta hajmdagi ma’lumotlarni tezkor tahlil qilib, harbiy qo‘mondonlarga strategik qarorlar qabul qilishda yordam beradi.
Biz bulut texnologiyalari bo‘yicha nima qilishimiz kerakligini aniq bilamiz. Shuningdek, bu tizim uchun qanday uchuvchisiz qurilmalar, brigadalar va boshqa resurslar kerak bo‘lishini ham aniq belgilab olganmiz, dedi Donaxyu.
Izoh (0)