Majburiy ijro byurosi Namangan viloyati boshqarmasi qidiruv sho‘basi xodimlari tomonidan tezkor tadbirlar olib borilmoqda. Bu haqda Majburiy ijro byurosi matbuot xizmati xabar berdi.
Aniqlanishicha, sudning qaroriga ko‘ra daʼvogar ATB Kapitalbank foydasiga javobgar D.M.dan kredit va uning foizlaridan 306 mln so‘m undirish belgilangan.
Byuroning Chortoq tuman bo‘limi tomonidan olib borilgan ijro harakatlari davrida qarzdor fuqaroga ixtiyoriy muddatda sud qarorida ko‘rsatilgan mablag‘ni to‘lab qo‘yish yuzasidan ogohlantirilgan.
Biroq qarzdor majburiyatni bajarmagan. Shundan so‘ng majburiy ijro harakatlariga kirishilgan. Tezkor maʼlumotlarga ko‘ra, qarzdorga tegishli xorijda ishlab chiqarilgan avtotransport borligi aniqlangan.
Lekin D.M. qarzini to‘lamasdan, avtomashinada harakatlanishni davom ettirgan.
Olib borilgan tadbir davomida Kia rusumli mashina topilib, jarima maydonchasiga joylashtirildi.
Izoh (0)