Shavkat Mirziyoyevning Kuvaytga rasmiy tashrifi arafasida 15-fevral kuni ushbu mamlakat poytaxtida O‘zbekiston—Kuvayt biznes-forumi bo‘lib o‘tdi, deb xabar bermoqda “Daryo” muxbiri.
Tadbirda ikki davlatning tegishli vazirlik va idoralari, tarmoq birlashmalari rahbarlari hamda 100 dan ko‘proq yirik kompaniya va moliya institutlari rahbarlari ishtirok etdi. Forumda delegatsiyalarga O‘zbekiston tomonidan — O‘zbekiston investitsiyalar, sanoat va savdo vaziri Laziz Qudratov, Kuvayt tomonidan — Kuvayt Savdo-sanoat palatasi rahbari Rabah al-Rabah boshchilik qildi.
Forumning ochilish marosimida qutlov so‘zi bilan so‘zga chiqqan Laziz Qudratov so‘nggi yillarda O‘zbekiston bilan Kuvayt o‘rtasidagi munosabatlar rivojlanib borayotganini alohida ta’kidladi. O‘zbekistonda sog‘liqni saqlash, qishloq xo‘jaligi, infratuzilma, mehmonxona biznesi, farmatsevtika va ko‘chmas mulk sohalarida loyihalarni muvaffaqiyatli amalga oshirayotgan yirik kompaniyalar qatorida Gulf Care, Al Tijaria, Al Imtiaz, Fouad Al Ghanim, Agility va boshqalar bor.
O‘zbekistonda xorijiy investorlar uchun eng qulay sharoitlar yaratilgani ta’kidlandi. Xususan,imtiyozlar va preferensiyalar joriy etildi, tadbirkorlar duch kelayotgan to‘siqlar olib tashlanmoqda, xususiylashtirish dasturi amalga oshirilmoqda, infratuzilmasi rivojlangan o‘nlab EIZlar tashkil qilindi, MDH va Yevropa Ittifoqi bozorlariga bojsiz kirish ta’minlandi. Natijada so‘nggi yillarda O‘zbekiston iqtisodiyoti qariyb ikki baravar oshdi. Birgina 2024-yilda YaIM 6,5 foizga o‘sib, 115 milliard dollarga yetdi. Xorijiy investitsiyalar hajmi 1,6 barobar ko‘payib, 34,9 milliard dollarni tashkil etdi.
Shu bilan birga, ikki davlat o‘rtasidagi savdo-iqtisodiy, sarmoyaviy va sanoat sohasidagi hamkorlikni chuqurlashtirish bo‘yicha foydalanilmayotgan ulkan salohiyatga eʼtibor qaratildi.
Shu o‘rinda, agrosanoat tarmog‘i, to‘qimachilik sanoati, tog‘-kon sanoati, energetika va neft-kimyo, sog‘liqni saqlash va farmatsevtika, xususiylashtirish, logistika, aloqa va turizm kabi hamkorlikni yanada rivojlantirishning ustuvor yo‘nalishlari sanab o‘tildi.
O‘z navbatida, Kuvayt Savdo-sanoat palatasi rahbari Rabah al-Rabah O‘zbekistonning ikki tomonlama savdo-iqtisodiy va sarmoyaviy hamkorlikni rivojlantirish uchun shart-sharoitlar yaratish borasidagi saʼy-harakatlarini yuqori baholadi hamda Kuvayt va O‘zbekiston tadbirkorlarini hamkorlikni chuqurlashtirishga chaqirdi, ularni tomonlarning yangi loyihalar va tashabbuslarni qo‘llab-quvvatlashga o‘zaro tayyor ekaniga ishontirdi.
Biznes-forum doirasida “B2B” va “G2B” muzokaralari tashkil etildi. Tadbirkorlar yangi aloqalarni o‘rnatish, qo‘shma loyihalarning muhimjihatlari va tovarlarni o‘zaro yetkazib berish masalalarini muhokama qilish imkoniga ega bo‘ldi.
Shuningdek, forum doirasida O‘zbekiston milliy mahsulotlari ko‘rgazmasi tashkil etilib, unda tadbirkorlar tashqi bozorda talab yuqori bo‘lgan mahsulotlarni namoyish etdi.
Tadbir yakunlari bo‘yicha qator investitsiyaviy bitimlar va savdo shartnomalari imzolandi. Biznes doiralari vakillariga ko‘ra, imzolangan hujjatlar qisqa vaqt ichida O‘zbekiston—Kuvayt aloqalarini sezilarli darajada kengaytirish va ikki davlat o‘rtasidagi tovar ayirboshlash hajmini oshirish imkonini beradi.
O‘zbekiston prezidentining Kuvaytga tashrifi
Shavkat Mirziyoyev Kuvayt amiri Mish’al as-Sabohning taklifiga binoan 17—18-fevral kunlari rasmiy tashrif bilan ushbu mamlakatda bo‘ladi. Al-Kuvayt shahrida oliy darajada ikki tomonlama muzokaralar hamda ushbu mamlakat hukumati a’zolari, yetakchi kompaniyalari va bank-moliya tuzilmalari rahbarlari bilan uchrashuvlar bo‘lib o‘tadi.
O‘zbekiston—Kuvayt munosabatlari
Kuvayt O‘zbekisyon mustaqilligini 1991-yil 30-dekabarda tan olgan. Ikki davlat o‘rtasida diplomatik munosabatlar 1994-yil iyulda o‘rnatilgan. Kuvayt elchixonasi Toshkentda 2001-yilda, O‘zbekistonning Al-Kuvaytdagi elchixonasi esa 2004-yilda ochilgan.
Ikki mamlakat xalqaro tashkilotlar va moliyaviy institutlar, jumladan, BMT va IHT doirasida yaqindan hamkorlik qilmoqda. Ikki davlar Tashqi ishlar vazirliklari o‘rtasida siyosiy maslahatlashuvlarning ikkita davrasi o‘tkazilgan.
2004-yil 19-yanvarda imzolangan savdo, iqtisodiy, ilmiy va texnik hamkorlikka oid bitimga asosan savdo-iqtisodiy hamkorlik bo‘yicha qo‘shma hukumatlararo komissiyasi tuzilgan. Uning hamraislari etib ikki davlat moliya vazirlari tayinlangan.
2024-yil 16—21-oktyabr kunlari Toshkent shahri, Farg‘ona va Sirdaryo viloyatlarida O‘zbekiston—Kuvayt biznes-forumlari o‘tkazilgandi. O‘sha yilning may va avgust oylarida Kuvaytda biznes forumlar va Made in Uzbekistan ko‘rgazmalari o‘tkazildi.
Izoh (0)