1-yanvar kuni kechqurun Nyu Yorkning Kvins tumanidagi tungi klub oldida otishma sodir bo‘ldi. Hodisa oqibatida 10 kishi yaralandi.
Politsiya otishmaning jinoiy guruh faoliyatiga aloqadorligini tekshirmoqda va hozircha bu holat terrorizm bilan bog‘liq emas deb hisoblayapti.
ABC News xabariga ko‘ra, bir guruh erkaklar klub tashqarisida navbatda turgan 15 ga yaqin odam tomonga qarata o‘t ochgan. Yaralanganlarning barchasi 16 yoshdan 20 yoshgacha bo‘lgan yigitlar, deydi politsiya.
Hammasi bo'lib 30 ga yaqin o'q uzilgan. Gumonlanuvchilar voqea joyini mashinada tark etgan.
Nyu Yorkdagi otishma Nyu-Orleandagi hujum bilan bir kunda sodir bo'ldi.
Yangi yilning dastlabki soatlarida Yangi Orleandagi Kanal va Burbon ko‘chalari kesishmasida avtomobil haydovchisi olomonga qarata haydashi oqibatida o‘n kishi halok bo‘ldi, 30 kishi jarohat oldi.
Yangi Orleandagi hodisa
Yangi Orlean shahri meri LaToya Kentrell voqeani ochiqchasiga “terakt” deb atagan.
Politsiya vakillari mazkur hujum imkon qadar ko‘proq odamlarga zarar yetkazish maqsadida oldindan rejalashtirilgani hamda qasddan amalga oshirilganini rasman tasdiqlagan. Voqea joyida portlovchi qurilmalarga o‘xshash buyumlar ham topilgan, biroq ular haqiqiy qurilmalar yoki mulyajlar ekanligi hozircha aniq emas.
CBS News telekanali guvohlarga tayanib, yuk mashinasi katta tezlikda olomonga qarata haydagani, shundan so‘ng haydovchi mashinadan tushib, quroldan o‘q uzganini, politsiya esa javob o‘q uzganini xabar qilgan.
Bir juft guvohning CBS News’ga aytishicha, ular o‘zlari turgan ko‘chadan uzoqda gumburlagan ovozni eshitishgan va keyin oq yuk mashinasi yuqori tezlikda barrikadani yorib o‘tayotganini ko‘rishgan.
Izoh (0)