Rossiya Poltavaga hujum qildi, 41 kishi halok bo‘ldi (video)

Rossiya harbiylarining Poltava shahriga bergan zarbasi oqibatida 41 kishi halok bo‘ldi. Bu haqda Ukraina prezidenti Vladimir Zelenskiy xabar berdi.

Hujum 3-sentyabr kuni ertalab amalga oshirilgan. Oqibatda 180 dan ortiq kishi jarohatlangan. Shahar ballistik raketalar bilan o‘qqa tutilgan, ular ta’lim muassasasi va yaqin atrofdagi kasalxonaga kelib tushgan.

“Aloqa instituti binolaridan biri qisman vayron bo‘lgan. Odamlar vayronalar ostida qoldi. Ularning aksarini qutqarishga muvaffaq bo‘lindi. 180 dan ortiq kishi yaralangan. Afsuski, qurbonlar ko‘p. Hozirda 41 kishi halok bo‘lgani ma’lum. Ularning barcha qarindoshlari va yaqinlariga hamdardlik bildiraman”, dedi Zelenskiy.

Siyosatchiga ko‘ra, qutqaruv ishlariga barcha tezkor xizmatlar jalb qilingan.

“Men zarbadan so‘ng birinchi daqiqalardanoq odamlarga yordam bergan, o‘zgalar hayotini saqlab qolgan har bir kishidan minnatdorman”, deya ta’kidladi Ukraina prezidenti.