Germaniya g‘arbidagi Zigen shahrida ayol kishi avtobusda yo‘lovchilarga pichoq bilan hujum qilishi oqibatida kamida besh kishi jarohatlandi. Bu haqda Bild nashri yozmoqda.
Nashrning yozishicha, voqea mahalliy vaqt bilan 19:40 atrofida sodir bo‘lgan. Uch kishining ahvoli og‘ir ekani xabar qilinyapti.
Barcha yaradorlar shifoxonalarga yetkazilgan. Politsiya ma’lumotlariga ko‘ra, avtobus Zigen shahrida tashkil etilgan festivalga ketayotgan edi. Jinoyat sodir bo‘lgan vaqtda avtobusda kamida 40 nafar yo‘lovchi bo‘lgan. Huquq-tartibot idoralari xodimlari bu voqeani terakt sifatida baholamadi.
![](/static/2024/08/31/zigen-gjLwhab_.jpg)
Voqea joyiga politsiya xodimlari yetib kelib, ayolni hibsga olgan.
Bild nashrining yozishicha, ayol 32 yoshda. U nemis bo‘lib, ruhiy kasal va giyohvand moddalar ta’sirida bo‘lishi mumkin. Guvohlar so‘roq qilinmoqda. Avtobus yo‘lovchilariga psixologik yordam ko‘rsatilmoqda.
24-avgust kuni Germaniyaning Zolingen shahridagi festivalda noma’lum erkak pichoq bilan odamlarga hujum qilgandi. Hujum mahalliy vaqt bilan taxminan 21:45 da Zolingenning 650 yilligiga bag‘ishlangan festivalda sodir bo‘lgan. Dastlabki ma’lumotlarga ko‘ra, noma’lum erkak duch kelgan odamga tashlanib, uni pichoqlashga uringan.
Keyin jinoyatchi voqea joyidan qochib ketishga muvaffaq bo‘lgan.
Izoh (0)