Yangi yilning dastlabki soatlarida Yangi Orleandagi Kanal-strit va Burbon-strit ko‘chalari kesishmasida avtomobil haydovchisi olomonga qarata haydashi oqibatida o‘n kishi halok bo‘ldi, 30 kishi jarohat oldi.
Avvalroq Yangi Orlean politsiyasi ko‘plab qurbonlar, jumladan, o‘lim bilan yakunlangan hodisa sodir bo‘lganini ma’lum qilgan edi. NOLA Ready nashri odamlarga bu hududdan uzoqroq turishni tavsiya qilgan. Agentlikning ma’lum qilishicha, jarohatlanganlar 5 ta mahalliy shifoxonaga yetkazilgan.
Hodisa Yangi Orleandagi Yangi yil bayrami yakunida va minglab tomoshabinlar ishtirok etishi kutilayotgan AllState Bowl futbol chorak finali boshlanishidan bir necha soat oldin sodir bo‘lgan.
“Bugun ertalab Burbon stritda dahshatli zo‘ravonlik hodisasi sodir bo‘ldi”, dedi Luiziana shtatining gubernatori Jeff Landri X ijtimoiy tarmog‘ida, shuningdek, odamlarni hujum sodir bo‘lgan hududdan uzoqroq turishga chaqirdi.
Yangi Orlean shahri meri LaToya Kentrell voqeani ochiqchasiga “terakt” deb atagan.
Politsiya vakillari mazkur hujum imkon qadar ko‘proq odamlarga zarar yetkazish maqsadida oldindan rejalashtirilgani hamda qasddan amalga oshirilganini rasman tasdiqlagan. Voqea joyida portlovchi qurilmalarga o‘xshash buyumlar ham topilgan, biroq ular haqiqiy qurilmalar yoki mulyajlar ekanligi hozircha aniq emas.
CBS News telekanali guvohlarga tayanib, yuk mashinasi katta tezlikda olomonga qarata haydagani, shundan so‘ng haydovchi mashinadan tushib, quroldan o‘q uzganini, politsiya esa javob o‘q uzganini xabar qilgan.
Bir juft guvohning CBS News’ga aytishicha, ular o‘zlari turgan ko‘chadan uzoqda gumburlagan ovozni eshitishgan va keyin oq yuk mashinasi yuqori tezlikda barrikadani yorib o‘tayotganini ko‘rishgan.
Izoh (0)