Xitoyning Yunnan provinsiyasida pichoq bilan qurollangan noma’lum erkak kasalxonadagi odamlarga hujum qildi. Bu haqda CNN xabar berdi.
Hodisa 7-may kuni mahalliy vaqt bilan soat 11:37 da Chjen Syun okrugidagi kasalxonada sodir bo‘lgan. Hujum oqibatida ikki kishi halok bo‘lgan, 21 kishi yaralangan. Barcha jabrlanganlar kasalxonaga yotqizilgan. Gumonlanuvchi Potszi qishlog‘ida yashovchi shaxs bo‘lib chiqqan. Holat yuzasidan tergov davom etmoqda.
Eslatib o‘tamiz, 2023-yil Xitoy janubi-sharqidagi Guandun provinsiyasida noma’lum shaxs bolalar bog‘chasiga pichoq bilan hujum qilgandi. Oqibatda olti kishi halok bo‘lgan: bir tarbiyachi, ikki ota-ona va uch nafar tarbiyalanuvchi, bir kishi yaralangan.
2021-yilda Xitoy janubidagi Guansi-Chjuan avtonom tumanidagi bolalar bog‘chasiga bir erkak pichoq bilan hujum qilgandi. Oqibatda 18 kishi jarohatlangan — 16 bola va ikki o‘qituvchi.
2018-yilda Xitoyning Shensi provinsiyasida noma’lum shaxs o‘rta maktab o‘quvchilariga hujum qilishi oqibatida yetti nafar o‘quvchi halok bo‘lgan, yana 12 nafari jarohatlangan. Qotil qo‘lga olingan.
Izoh (0)