Toshkent shahrida 6-fevral kuni O‘zbekiston tomonidan adliya vaziri Akbar Toshqulov hamda Shveysariyaning O‘zbekistondagi elchisi Konstantin Obolenskiy o‘rtasida “Musodara qilingan aktivlarni taqsimlash to‘g‘risidagi bitim” imzolandi. Bu haqda Adliya vazirligi xabar berdi.
Bitim doirasida taxminan 182 mln dollar miqdoridagi mablag‘ O‘zbekistonga qaytarilishi belgilangan.
Mazkur mablag‘lar O‘zbekistonning ayrim fuqarolari tomonidan noqonuniy orttirilgan bo‘lib, 2012-yilda Shveysariya Bosh prokuraturasi tomonidan Gulnora Karimovaga nisbatan qo‘zg‘atilgan jinoyat ish yurituvi doirasida to‘laqonli musodara qilingan edi.
Mablag‘lar Birlashgan Millatlar Tashkilotining “Uzbekistan Vision 2030 Fondi” Ko‘p sheriklik trast jamg‘armasi orqali qaytariladi.
Eslatib o‘tamiz, 2022-yilning avgustida Shveysariyaning Bern shahrida O‘zbekiston va Shveysariya Konfederatsiyasi o‘rtasidagi “Shveysariya Konfederatsiyasi hududida musodara qilingan noqonuniy orttirilgan aktivlarni O‘zbekiston aholisining manfaatlari yo‘lida qaytarish usullari to‘g‘risidagi bitim” imzolangan. Ushbu bitim noqonuniy orttirilgan aktivlarni BMTning “Uzbekistan Vision 2030 Fondi” deb nomlangan Ko‘p sheriklik trast jamg‘armasi orqali O‘zbekistonga qaytarish mexanizmi hamda asosiy tamoyillar va maqsadlarni belgilaydi.
Mazkur ishlar doirasida 2022-yil avgustda imzolangan birinchi bitim taxminan 131 mln dollar miqdoridagi mablag‘larni O‘zbekistonga qaytarilishini nazarda tutadi. Yangi bitim imzolanishi bilan O‘zbekiston aholisining manfaatlari yo‘lida qaytarilgan mablag‘larning jami miqdori 313 mln dollarga yetadi.
“Uzbekistan Vision 2030 Fondi” orqali qaytarilayotgan mablag‘lar O‘zbekiston aholisining manfaatlari uchun, xususan sog‘liqni saqlash va taʼlim sohalarida ijtimoiy ahamiyatga molik loyihalarni amalga oshirishga yo‘naltiriladi.
Izoh (0)