Sobiq deputat, ekologiya vaziri maslahatchisi Rasul Kusherbayev Komil Allamjonovga uyushtirilgan suiqasdda ayblanayotgan shaxslar bo‘yicha fikrlarini bildirdi.
Kim o‘zi bu ikki shaxs? Qayerdan paydo bo‘ldi bu terrorchilar? Xavfli jinoyatchilar qaysi yo‘l bilan O‘zbekiston hududiga kirishdi? Bu masala aniq oydin aytilishi lozim.
Oldinroq Checheniston prezidenti Ramzan Qodirov suiqasdda “chechen qo‘li” borligini inkor qilib, o‘z chiqishida Komil Allamjonov va Dmitriy Liga tahdid qilgan, ularga “qilmishlari” uchun javob berishi haqida ochiqchasiga bayonot bergandi.
O‘zbekistondagi mansabdor shaxslarga ochiqcha tahdid qilish bu — terrorizm. Buni amalga oshirmoqchi bo‘lgan yoki gapirib chiqqan shaxslar ham javob berishi lozim, deb yozadi Kusherbayev.
U shunday tahdidlar bo‘layotgan vaqtda O‘zbekiston hukumati nega jim turishi kerakligi haqida savol qo‘ymoqda.
Qachongacha o‘zining shovinistik qarashlari bilan bizga ochiqcha tahdid qiladiganlarni indamay kuzatib o‘tiramiz? Rasmiy shaxs tomonidan bo‘layotgan ochiq tahdidga munosib javob berish vaqti kelmadimi?
Javob shunchaki bayonot bilan emas, aniq choralar orqali bo‘lishi shart va zarur! Kerak bo‘lsa, yetakchisi ochiqcha tahdid qilayotgan Grozniyga aviaqatnovlarni ham bekor qilish, har bir chechen fuqarosini O‘zbekistonga kirishda qat’iy tekshirish lozim, deya qo‘shimcha qiladi Rasul Kusherbayev.
Komil Allamjonovga uyushtirilgan suiqasd
26-oktyabr tunda Prezident administratsiyasi Axborot siyosati departamenti sobiq rahbari Komil Allamjonovga qurolli hujum uyushtirilgani haqida xabarlar tarqaldi. Bosh prokuratura bergan maʼlumotga ko‘ra, fuqaro S.S. boshqaruvidagi Range Rover rusumli avtomashina Qibray tumani, Ifor ko‘chasi bo‘ylab harakatlangan vaqtida ikki nafar nomaʼlum shaxs mashinaga o‘qotar quroldan bir necha marotaba o‘q uzib, nomaʼlum tomonga yashiringan.
Holat yuzasidan Jinoyat kodeksining 25, 97-moddasi (qasddan odam o‘ldirishga suiqasd qilish) bilan jinoyat ishi qo‘zg‘atildi. Maʼlumot uchun, ushbu holatda jinoyat sodir etgan shaxslar 15 yildan 25 yilgacha bo‘lgan muddatda ozodlikdan mahrum qilish orqali jazolanishi mumkin.
27-oktyabr kuni ushbu jinoyatni sodir etgan shaxslarning biri aniqlanib, gumonlanuvchi tariqasida ushlandi. 28-oktyabr kuni yana uch nafar gumonlanuvchi ushlandi. Noyabr oyida esa suiqasdda gumonlanib yana 5 kishi qamoqqa olingan.
Avvalroq Komil Allamjonov va Dmitriy Lini o‘ldirish uchun yollangan shaxslar – Bislan Rasayev hamda Shamil Temirxanov qidiruvga berilgani xabar qilingandi. Bosh prokuratura mazkur holat bo‘yicha qo‘shimcha ma’lumot berdi.
Komil Allamjonov 2024-yil 30-sentyabrda Prezident administratsiyasi Axborot siyosati departamentining rahbari lavozimini tark etgan edi. U faoliyatini xususiy sektorda davom ettirishini maʼlum qilgan.
Izoh (0)