Janubiy Koreya politsiyasi umumiy yig‘ilishda prezident Yun Sok Yolni uchinchi marta hibsga olish rejalarini muhokama qildi.
Bu haqda Yonhap agentligi ma’lum qildi.
Ikki soat davom etgan uchrashuvda hibsga olish sanasini 15-yanvarga belgilash imkoniyati muhokama qilindi. Bu safargi hibsga olish jarayoniga jami ming nafargacha tergovchi va politsiya xodimlari jalb etilishi mumkinligi avvalroq xabar qilingan edi.
Janubiy Koreya ommaviy axborot vositalari prezidentni hibsga olishga navbatdagi urinish shu haftaning ish kunlarida sodir bo‘lishi mumkinligini taxmin qilgan edi.
O‘z navbatida, prezident xavfsizlik xizmati bayonot berib, qo‘riqlanadigan hududga kirganlarga chegarani buzuvchi sifatida qaralishi haqida ogohlantirgan.
“Qo‘riqlanadigan hududga tegishli ruxsatsiz kirish qonun buzilishi hisoblanadi va huquqni muhofaza qilish organlarining qonunga zid xatti-harakatlari xavfsizlik qoidalari hamda qonun hujjatlariga muvofiq ko‘rib chiqiladi”, deyiladi xizmat xabarida.
Seulning G‘arbiy okrug sudi 31-dekabr kuni prezident Yun Sok Yolni hibsga olish uchun order bergandi.
Bunga lavozimidan chetlatilgan prezident qo‘zg‘olonga rahbarlik qilish va hokimiyatni suiiste’mol qilishda ayblanib, uch marta so‘roqqa kelmagani sabab bo‘ldi.
Bu Janubiy Koreya tarixida amaldagi davlat rahbariga hibsga olish uchun order berilgan birinchi holatdir. Yonhap xabariga ko‘ra, tintuv uchun ham order berilgan.
Izoh (0)