Ижтимоий тармоқларда Сурхондарё вилоятининг Бойсун туманидаги “М-25” кони ҳудудида юзага келган вазият бўйича видеолар тарқалди. Ҳолат юзасидан Энергетика вазирлиги изоҳ берди.
Маълум қилинишича, “М-25” кони ҳудудида кичик ҳажмда тўпланган газни хавфсиз ёқиш ишлари олиб борилмоқда. Кон ҳудудида ҳеч қандай кутилмаган вазиятлар кузатилмаган.
Бугунги кунда 2024 йил сентябрь ойида метан эмиссияси содир бўлган қудуқ ўрнида объектни консервация қилиш бўйича режалаштирилган ишлар олиб борилмоқда ва бу ерда доимий мониторинг юритиляпти.
604-сонли қудуқда тозалаш ишлари олиб борилаётганда қудуқдан олис ҳудудларда ер юзасига яқин жойлашган бўшлиқлар ва коллекторлардаги микро ёриқларда кичик ҳажмдаги газ тўпланган.
Айни пайтда ҳудудда кичик ҳажмда тўпланган газни ёқиш орқали зарарсизлантириш ишлари олиб борилмоқда. Бундан кўзланган мақсад кислотали газларнинг атмосферага чиқишини олдини олишдан иборат.
“Ушбу жараён атроф-муҳит ифлосланишининг олдини олишда стандарт ёндашув ҳисобланади ва халқаро саноат хавфсизлиги талабларига тўла жавоб беради.
Режалаштирилган консервация ва профилактика ишлари мазкур технологик жараённинг ўзига хос хусусиятларини тушунмайдиган одамлар бошқача талқин қилиши мумкин бўлган бир қатор операциялардан иборат. Бунга ҳолат бўйича тарқалган видеолавҳа яхши мисол бўла олади”, дейилади хабарда.
Бойсун конидаги авария
1 сентябрь куни соат 15:17 да Сурхондарё вилояти Бойсун тумани “Кўлқамиш” МФЙ ҳудудида жойлашган “Мустақилликнинг 25 йиллиги” конига қарашли 604-сон қудуғида бурғилаш ишлари олиб бориш вақтида технологик жараённинг бузилиши оқибатида олтингугурт (водород сулфид) гази чиқиши кузатилди. Аҳоли хавфсизлигини таъминлаш мақсадида кон яқинида яшовчи фуқаролар хавфсиз ҳудудга эвакуация қилинди. Техноген офат асоратларини бартараф этиш бўйича барча тегишли вазирлик ва ташкилотларни жалб этган ҳолда, тезкор штаб ташкил этилди.
15 сентябрь куни соат 16:50 да сизиб чиқиш тўхтатилди. 17 сентябрь куни эса мазкур конда яна газ чиқиш ҳолати юз берди. Янги авария оқибатида тўрт киши ҳалок бўлди. Улар конда ишлаган пудратчи ташкилот ходимлари бўлган.
Изоҳ (0)