O‘zbekistonda so‘nggi 10 yilda zilzilalar oqibatida 16 kishi halok bo‘lgan
O‘zbekistonda so‘nggi 10 yilda olti marotaba 6-8 balli zilzila sodir bo‘lgan va ular natijasida yetkazilgan iqtisodiy zarar 84 milliard so‘mni tashkil etgan. Bu haqda Favqulodda vaziyatlar, Qurilish vazirliklari, Fanlar akademiyasi Seysmologiya instituti va boshqa masʼul tashkilotlar vakillari ishtirokida o‘tkazilgan matbuot anjumanida ma’lum qilindi.
O‘zbekiston geologik joylashuviga ko‘ra, O‘rta Yer dengizi — Osiyo seysmik kamarida joylashgan. Shu boisdan, respublika va unga chegaradosh hududlarda tez-tez zilzilalar sodir bo‘lib turishi tabiiy hol sanaladi. Taʼkidlanishicha, O‘zbekiston hududlarida 1900-yildan shu kunga qadar 60 dan ortiq kuchli va halokatli (magnitudasi 5 dan yuqori bo‘lgan) zilzilalar sodir bo‘lgan.
So‘nggi 10 yil mobaynida respublikada jami olti marotaba 6-8 balli zilzilalar sodir bo‘lgan, natijada qurbonlar soni 16 kishini, jabrlanganlar soni 54 kishini, iqtisodiy zarar esa 84 milliard so‘mni tashkil etgan.
Bular:
- Kon zilzilasi — 2011-yil (8 ball),
- Tuyabo‘g‘iz zilzilasi — 2013-yil (7 ball),
- Marjonbuloq zilzilasi — 2013-yil (8 ball),
- Kitob va Baxmal zilzilalari — 2016—2017-yillar (7 ball),
- Boysun zilzilasi – 2022-yil (6 ball).
Shuningdek, Seysmoprognostik monitoring Respublika markazi tomonidan O‘zbekiston va unga chegaradosh hududlarda 2023-yil 1-yanvardan bugungi kungacha magnitudasi (M= 2,8-6,8) bo‘lgan 250 dan ortiq zilzila qayd etilgan.
Kuni kecha O‘zbekistonda yaqin kunlarda yana zilzila sodir bo‘lishi haqida turli xabarlar tarqalgandi. Favqulodda vaziyatlar vazirligi holatga munosabat bildirib, bugungi kunda dunyoning hech bir davlatida zilzila sodir bo‘ladigan sana va hatto taxminiy vaqtni bashorat qila oladigan texnologiyalar mavjud emasligini, O‘zbekiston seysmik faol zonada joylashgani sababli baʼzida yer silkinishlari sodir bo‘lishi va har doim shunday bo‘lganini bildirgandi.
