Ijtimoiy tarmoqlarda Surxondaryo viloyati Boysun tumanida gaz chiqishi oqibatida odamlar yashab turgan uylaridan boshqa yerga vaqtincha ko‘chirilayotgani haqida xabarlar paydo bo‘ldi.
Favqulodda vaziyatlar vazirligi hodisa to‘g‘risida rasmiy ma’lumot berdi.
Unga ko‘ra, 1-sentyabr kuni soat 15:17 da Surxondaryo viloyati Boysun tumani “Ko‘lqamish” MFY hududida joylashgan “Mustaqillikning 25 yilligi” koniga qarashli 604-son qudug‘ida burg‘ilash ishlari olib borish vaqtida texnologik jarayonning buzilishi oqibatida oltingugurt (vodorod sulfid) gazi chiqishi kuzatilgan.
Aholi xavfsizligini ta’minlash maqsadida kon yaqinida yashovchi fuqarolar xavfsiz hududga evakuatsiya qilingan.
“Fuqarolarning tan jarohati olish va halok bo‘lish holatlari qayd etilmagan. Vaziyat to‘liq nazorat ostida.
Hodisa joyiga tegishli tashkilotlarning vakillari yetib borib, mutaxassislar tomonidan barcha zaruriy ishlar olib borilmoqda”, deyiladi Favqulodda vaziyatlar vazirligi xabarida.
Energetika vazirligining xabar berishicha, voqea joyiga zudlik bilan mas’ul shaxslar yetib borgan.
"Prezidentning shaxsan topshiriqlariga asosan, Bosh vazir o‘rinbosari Ochilboy Ramatov, Favqulodda vaziyatlar vaziri general mayor Abdulla Qo‘ldoshev, Energetika vaziri Jo‘rabek Mirzamahmudov, Surxondaryo viloyati hokimi Ulug‘bek Qosimov hamda “O‘zbekneftgaz” AJ boshqaruv raisi Bahodir Sidiqov hodisa joyiga yetib borishdi.
Bu yerda barcha tegishli vazirlik va tashkilotlarni jalb etgan holda, Tezkor shtab tashkil qilingan. Texnogen ofat asoratlarini bartaraf etish bo‘yicha zarur choralar ko‘rilmoqda.
Hodisa to‘g‘risida yana batafsil ma’lumot beriladi", — deyiladi Energetika vazirli xabarida.
Izoh (0)