Sentyabr oyi boshida vodorod sulfid ajralib chiqqan “Mustaqillik-25” konida ayni paytda 604-sonli quduqni so‘ndirish jarayoni yakunlandi. Bu haqda FVV matbuot xizmati “Daryo”ga xabar berdi.
Maʼlum qilinishicha, shu maqsadda sizib chiqishga qarshi uskunaning qo‘shimcha blogi qurildi va o‘rnatildi. So‘ndirish uchun quduq og‘zini tayyorlash va bog‘lash jarayoni o‘tkazildi. Quduq germetiklandi va so‘ndirildi.
14-sentyabr kuni taxminan soat 13:05 da minoradan chiqib turgan quvurning ustiga PVO (sizib chiqishga qarshi qurilma) o‘rnatilib, 15-sentyabr kuni to‘liq tizimni presslash o‘tkazildi. 15-sentyabr kuni soat 16:40 da Barit nomli maxsus eritma yuborildi va 16:50 lar chamasi minoradan va chiqaruvchi uskunalardan gaz chiqishi to‘xtatildi.
Hodisa oqibatlarini rejali bartaraf etish jarayoni maxsus tashkil etilgan shtab nazorati ostida amalga oshirildi. Vaziyatni professional baholash maqsadida voqea joyiga O‘zbekiston, shuningdek, Rossiya va AQSH ekspertlarining tashrifi tashkil etildi.
Taʼkidlanishicha, hodisa oqibatlarini bartaraf etish davomida aholi uchun hech qanday xavf bo‘lmagan.
Barcha zarur chora-tadbirlar ochiq neft va gaz favvoralarning oldini olish va bartaraf etish bo‘yicha O‘zbekiston harbiylashtirilgan qismi, O‘zbekiston Respublikasi FVV va “Sanoatkontexnazorat” davlat inspeksiyasi bilan hamkorlikda amalga oshirildi.
Ishlar barcha zarur texnika va uskunalar bilan to‘liq taʼminlangan holda olib borildi. Hodisa boshidan barcha zarur choralar ko‘rilgan. Xususan, atrofda joylashgan aholi punktlarida havo muhitini o‘lchash va monitoring qilish uchun maxsus postlar o‘rnatildi.
Tahlillar shuni ko‘rsatdiki, atmosferada zararli moddalarning ruxsat etilgan maksimal konsentratsiyasidan oshib ketish holatlari kuzatilmayapti. Shuningdek, burg‘ilash qurilmasining ishchi maydonini tozalash ishlari amalga oshirildi va yakunlandi, tayanch maydon maxsus texnika va uskunalarni to‘liq o‘rnatish va foydalanish uchun tayyorlandi.
Shuni qo‘shimcha qilamizki, “Mustaqillik-25” konini o‘zlashtirish alohida murakkabligi bilan ajralib turadi, bu yerda xalqaro tajribadan foydalaniladi va kuchaytirilgan xavfsizlik choralari ko‘riladi, shu jumladan, xodimlarga doimiy yo‘l-yo‘riq ko‘rsatiladi. Uglevodorodni qazib olish tobora murakkablashib bormoqda, bu esa doimiy ravishda yangi tajriba va ko‘nikmalarni talab qiladi, deyiladi xabarda.
Izoh (1)
Ommaviy zaxarlanish yo'q lekin Asta sekinlik bilan zaxarlanish uning asorotlari va uning oqibatida tuguladigan nogiron chaqaloqlarga kim jovob beradi. Shunchaki uzoqdan turib bunaqa baland parvoz gap gapirish juda osson. Hozirgi kunda barcha boysun halqi shu zaxarli gazdan nafas olishyabti. Nima bolganda ham biz gaz ishlab chiqarishdan toxtamaymiz deyisha olmagandan kampitsatsya tolaymiz unaqa qilamiz deb yozishyabti xolos
Barcha boysun xalqiga juda qattiq sabr tilayman
Halok bolgalarning oilasiga chuqur hamdardlik tilab qolaman