1990-yillarning oxiri, 2000-yillarning boshlarida birinchi koreys dramalari kassetalar sotiladigan peshtaxtalarda paydo bo‘lgan. O‘sha davrda Koreya kino olami bugungidek rang-barang va turfa seriallarga boy emasdi. Aynan dramalar orqali butun dunyodagi ko‘plab davlatlar Koreya xalqi, millati va urf-odatlariga qiziqish bildira boshladi. Minglab odamlar drama disklarini xarid qilar, qahramonlar taqdiri haqida qayg‘urib, seriallarni boshidan oxirigacha do‘stlar yoki oila davrasida katta qiziqish bilan tomosha qilar edi.
Loyihalardagi bosh qahramonlar esa butun dunyoga tanilib, haqiqiy kino yulduzga aylandi. Bu davrda hind kinolari davrini Koreya dramalari (Hallyu) egalladi.
Koreya to‘lqini yoki Hallyu — bu dunyo bo‘ylab koreys madaniyati, K-pop va K-dramaga bo‘lgan qiziqishning ortib borayotganini bildiruvchi tushuncha.
Bugun biz allaqachon Koreya kinosining klassikasiga aylangan 4 ta eng mashhur dramalarni yodga olishga qaror qildik.
“Qalbim chechagi”
Janubiy Koreya ijodkorlari tomonidan taqdim etilgan “Qalbim chechagi” seriali qiziqarli syujet, mahoratli aktyorlar ansambli hamda yoqimli qo‘shiqlari tufayli dunyo tomoshabinlarida koreys seriallariga nisbatan qiziqish uyg‘ota olgan ilk dramalardan bo‘ldi.
Drama 1997-yilda suratga olingan bo‘lib, unda soddadil va mehribon yetim qiz Li Yun Xi, xonanda bo‘lishni orzu qiladigan badavlat tadbirkorning o‘g‘li Kang Min Xi va mamlakatning yetakchi moda uylaridan birining dizayneri Li Jun Xi o‘rtasidagi sevgi uchburchagi haqida hikoya qiladi.
Serial saundtreklari esa ko‘plab musiqa shaydolariga manzur bo‘ldi, An Che Uk ijrosidagi “Forever” qo‘shig‘i bunga yaqqol misoldir.
“Qish sonatasi”
Yaponiyada va butun Osiyoda ayniqsa mashhur bo‘lgan ushbu drama haqida ko‘pchilik eshitgan bo‘lishi shubhasiz. Ko‘plab tomoshabinlar qalbidan joy olgan bu serial eng beg‘ubor sevgi haqida hikoya qiladi. Ikki yosh yigit va qiz — Jun Sang va Yu Jin bolalikda bir-biriga ko‘ngil qo‘yadi, biroq avtohalokat tufayli Jun Sangni halok bo‘ldi deb o‘ylagan Yu Jin uni ko‘rganida qattiq iztirob chekadi. Afsuski, xotirasini yo‘qotgan Jun Sang uni tanimaydi.
Ammo oxir-oqibat serialda sevgi g‘alaba qozonadi. Qayta-qayta ko‘rganda ham tomoshabin qalbini sof, samimiy tuyg‘ular tark etmaydi. Undagi ba’zi sahnalar suratga olingan Nami oroli Janubiy Koreyaning eng mashhur sayyohlik markazlaridan biriga aylangan.
-5RaiZQvw.jpeg)
Drama namoyish etilgandan so‘ng u yerga tashrif buyuruvchilar soni bir necha barobar oshdi. Mehmonlar bosh qahramonlar sayr qilgan xiyobonlarni kezishi yoki yo‘l bo‘ylab velosipedda uchishlari mumkin. U yerda hatto bosh qahramonlar Jun Sang va Yu Jin uchun yodgorlik ham o‘rnatilgan.
Dramada yangragan qo‘shiqlar esa o‘sha davrning mashhur xonandasi Ryu tomonidan ijro etilgan. Serialda skripka va pianinoda yaratilgan go‘zal ohanglar ham barcha uchun tanish. Dramaga saundtreklardan biri bo‘lgan “From the Beginning Until Now” bunga yaqqol misoldir.
“Saroy javohiri”
2003—2004-yillarda namoyish etilgan teleserial Janubiy Koreya kino sanoatida alohida o‘rin egallaydi. “Saroy javohiri” xalqaro hitga aylangan birinchi tarixiy dramalardan biri bo‘lib, dunyoning 90 dan ortiq mamlakatlarida namoyish etilgan va uning daromadi 103 million dollardan oshgan. Ushbu drama tufayli Eron, Turkiya, Saudiya Arabistoni, Peru, Kolumbiya, Misr, Avstraliya, AQSH, Yangi Zelandiya va Rossiya kabi mamlakatlarda koreys anʼanaviy madaniyati va tarixiga qiziqish yanada ortdi.
Ko‘p qismli serial real voqealarga asoslangan bo‘lib, Choson sulolasi podshohining birinchi ayol shifokori bo‘lishga muvaffaq bo‘lgan yetim qiz Tan Gem (Li Yong E) haqida hikoya qiladi. Bolaligidan jasur va qat’iyatli qahramon podshohni turli dardlardan davolash uchun koreys oshxonasi va tibbiyoti sirlarini o‘rganadi. Mazkur tarixiy dramada sevgi va do‘stlik, xiyonat, mamlakatdagi siyosiy vaziyatlar kabi turli mavzular ko‘tariladi.
Tarixiy janrda filmlar yaratish aslida o‘ta murakkab ishdir, ammo drama ijodkorlari o‘tgan davr voqealarini tomoshabinga yetkazib berishning uddasidan chiqdi. Serialda Koreyaning go‘zal tabiati, mahobatli saroylari, an’anaviy hanbok nomli liboslar va boshqa mayda detallar orqali XV asrga oid davr reallikka yaqin tarzda namoyon etilgan.
Qahramonlarning nutqlarida ham qadimgi koreys tiliga xos bo‘lgan iboralarga duch kelishingiz mumkin, chunki aktyorlar o‘sha davr muhitini yanada yaxshiroq ifodalash uchun tarixiy uslubdagi talaffuzni maxsus darslarda o‘rganishgan.
“Taqdir o‘yini”
Professional pokerchi Jimmi Chaning hayotidan ilhomlanib, aktyorlar Li Byon Xun va Song Xye-Kyo pul, muvaffaqiyat va sevgi uchun to‘qnashadigan qimor o‘yinlari dunyosi haqidagi hikoyada rol o‘ynagan.
Syujetga ko‘ra, bolaligida yetim qolgan Kim In Xa mahoratli qarta o‘yinchisi bo‘lgan amakisining qo‘lida tarbiyalanadi. U badavlat oilaning o‘g‘li Chve Yon Von bilan qalin do‘st tutinadi. Ko‘p o‘tmay In Xa bir qiz — Min Su Yon ismli go‘zalni uchratadi va uni sevib qoladi. Ammo qizga In Xaning yaqin do‘sti ham befarq emasdi.
Yon Von otasining hiylalari tufayli In Xa qotillikda gumon qilinadi va u Amerikaga qochishga majbur bo‘ladi. U yerda In Xa professional poker o‘yinchisi sifatida faoliyatini boshlaydi va xalqaro muvaffaqiyatlarga erishadi. Koreyaga qaytib, qahramon sevgisi uchun sobiq do‘sti bilan jangga kirishadi.
Serial koreys kinosining klassikasiga aylandi va Koreya bilan birga xorijda ham mashhurlikka erishdi. Drama SBS Drama Awards va Baeksang Arts Awards mukofotlarini qo‘lga kiritdi. Li Byon Xunga “Eng yaxshi televideniye aktyori” unvoni berildi.
Izoh (0)