Koreya seriallari butun dunyo bo‘ylab millionlab tomoshabinlarning mehrini qozondi. Agar siz hali dramalarni tomosha qilmagan bo‘lsangiz, endi ular bilan tanishish vaqti keldi! Siz uchun hayotimiz aslida naqadar go‘zal ekanini yodga soluvchi ezgulik va pozitivga to‘la yorqin koreys dramalarini to‘pladik.
“Yarqiragan tarvuz” (2023)
Maktabdagi yuqori sinf o‘quvchisi Ingyo‘l eshitish qobiliyati zaif insonlar oilasida tug‘ilib o‘sdi. U ota-onasi va akasi bilan imo-ishoralar tilida so‘zlashadi. Bolaligidan Ingyo‘l oila a’zolariga hamma narsada, jumladan, odamlar bilan muloqotda yordam beradigan itoatkor, namunali o‘g‘il bo‘lishga odatlangan. Biroq Ingyo‘l juda yaxshi eshitish qobiliyatiga ega — u hatto qor parchalarining yerga tushishini ham sezadi. Shu tufayli musiqada ham iste’dodli. Ingyo‘l gitara chalishni yaxshi ko‘radi, lekin o‘zining sevimli mashg‘uloti haqida oilasiga aytmaydi va tunda yashirincha qahvaxonalarda chiqish qiladi. Bir kuni otasi bundan xabar topadi va uyda janjal ko‘tariladi. Ingyo‘l kechasi shahar bo‘ylab aylanib yurganda g‘ayrioddiy musiqa do‘koniga ko‘zi tushadi. Ushbu do‘kon uni 1995-yilga olib boradi. O‘tmishda Ingyo‘l otasi bilan uchrashadi va yoshlikda otasi yaxshi eshitgan, gapirgan va hatto musiqiy guruh a’zosi bo‘lganini bilib qoladi.
“Samdalliga xush kelibsiz” (2023)
Voqealar Chejudo orolida bo‘lib o‘tadi. Bosh qahramonlar Samdal va Yonpil bolalikdan do‘st tutingan. Yonpil har doim o‘zi tug‘ilib o‘sgan vatanini yaxshi ko‘rgan bo‘lsa, Samdal ulg‘ayishi bilan Seulga ko‘chib o‘tishni orzu qilardi va u maqsadiga yetdi ham. Samdal va uning opa-singillari poytaxtga ko‘chib ketadi. Ular hatto ismlarini o‘zgartirib, moda sohasida karyera quradi. Yongpil esa o‘z ishiga sodiq meteorologga aylandi. Kunlarning birida Samdalning qaylig‘i unga qo‘l ostidagi xodimi bilan xiyonat qilganini bilib qoldi. Buning ustiga o‘sha ayol Samdalning karyerasi va obro‘yiga putur yetkazishga urinadi. Janjaldan so‘ng Samdal vataniga qaytishga va Chejudoda o‘zining bolalikdagi do‘sti bilan uchrashishga qaror qildi.
“Kayfiyatni ko‘taring” (2022)
Do Xei poytaxtdagi nufuzli universitet talabasi. U o‘ta nochor oilada voyaga yetdi. Shuning uchun u onasi va ukasini ta’minlaydi, barcha moliyaviy mas’uliyatni o‘z zimmasiga oladi. Pul topish tashvishi unga o‘qish yoki shaxsiy orzularini ro‘yobga chiqarishdan ham muhimroq edi. Xeini qo‘llab-quvvatlovchilar raqs guruhiga taklif qilishganda avvaliga buni rad etadi, chunki u qimmatli vaqtini behuda sarflashni istamaydi. Ammo keyinroq u raqs guruhi rahbari Chonga yordam berishga qaror qiladi va cherliderlar to‘garagiga qatnay boshlaydi.
“Olisdagi yashil bahor” (2021)
Ye Jun ismli birinchi kurs talabasi universitetdagi eng mashhur va kelishgan yigit. Uning did bilan kiyinishi, chiroyli tabassumi va ajoyib xarakteri atrofidagilarni doim o‘ziga jalb qilib kelgan. Ye Jun boshqalar bilan osongina til topishsa-da, chin do‘stlari yo‘q. Badavlat oiladan bo‘lgan va doimo kulib turadigan yigitning qalbida esa aslida doimo o‘zini ko‘z-ko‘z qilishga majbur bo‘lgan juda zaif bola yashiringan.
“Hech narsa qilishni istamayman” (2022)
Yorim ismli qizning butun umri yugurish marafoniga o‘xshaydi: avval universitetga kirish uchun maktabni a’lo baholarga tugatish kerak edi. Keyin esa qizil diplom olish uchun tirishqoq talaba bo‘lish. Endilikda u g‘ildirak ichida yugurib ketayotgan sichqondek ishga shoshadi. Buning ustiga u yolg‘iz, do‘stlari ham yo‘q. Qaylig‘i qizni yaqinda tashlab ketdi. Yorimning yagona do‘sti uning onasi edi. Ammo u ham baxtsiz hodisadan vafot etdi. Shundan so‘ng Yorim hayoti qanchalik ma’nosiz ekanligini tushunib yetadi, ishi va boshqa barcha narsadan voz kechib, qishloqda yashashga qaror qiladi.
“Shifokor inqirozga yuz tutdi” (2024)
Chonu va Hanil bir sinfda o‘qigan va hozirda ular shifokor bo‘lib ishlaydi. Chonu ko‘plab muvaffaqiyatli operatsiyalarni bajargan va mashhur plastik jarroh. Hanil esa professor bo‘lishni orzu qiladigan anesteziolog. Ammo ikkisining hayoti birdan o‘zgarib ketdi: Chonuning bemori operatsiya vaqtida to‘satdan vafot etadi va uning karyerasi bir kunda tanazzulga uchraydi. Hanil esa ishda adolatsizlikka duch keladi. Omadsiz kunlarni boshidan kechirayotgan bu ikki shifokor taqdir taqozosi bilan uchrashib qoladi va maktab yillarida raqib bo‘lgan sinfdoshlar endilikda bir-biriga yordam berishga qaror qiladi.
Izoh (0)