AQSH sobiq prezidenti Donald Tramp shaxsiy suhbatida Qrim va Donbassni Rossiyaga berish orqali Ukrainadagi urushni tugatishi mumkinligini aytgan. Bu haqda suhbatdan xabardor manbaga tayanib, The Washington Post xabar berdi.
Tramp bir necha bor AQSH prezidenti etib qayta saylansa, 24 soat ichida Rossiya va Ukraina o‘rtasidagi urush borasida kelishuvga erishishini aytgandi. Ammo u muntazam ravishda reja mazmunini oshkor qilishdan bosh tortgan. Anonimlik sharti bilan Tramp bilan masalani muhokama qilgan odamlar reja Ukrainani Qrim va Donbassni Rossiyaga berishga undash ekanini bildirdi.
“Tramp suhbatda Rossiya ham, Ukraina ham o‘z yuzini saqlab qolishini va konfliktdan chiqish yo‘lini istashini aytdi. Ukrainaning ayrim hududlaridagi odamlar Rossiyaning bir qismi bo‘lishga qarshi emasligini bildirdi”, — deydi manba.
Ta’kidlanishicha, Trampning ba’zi hamkorlari uni bunday rejadan qaytarishga uringan.
“Men vaqtimning 100 foizini Tramp bilan Ukraina haqida suhbatlashishga sarfladim. U (Putin) tovon to‘lashi kerak. U bu urushda yuta olmaydi”, — deydi respublikachi senator Lindsi Grem.
Trampning matbuot xizmati yuqoridagi dalillar ishonchli emasligi haqidagi bayonot bilan cheklanib, bu ma’lumotni bevosita rad etishdan bosh tortdi.
“Prezident Trampning rejasiga oid har qanday taxminlar nima bo‘layotgani yoki nima bo‘lishi haqida hech qanday tasavvurga ega bo‘lmagan, nomaʼlum manbalardan keladi. Prezident Tramp qotillikni to‘xtatish haqida gapirayotgan yagona odamdir”, — dedi matbuot kotibi Kerolin Leavitt.
Trampning Rossiya bo‘yicha sobiq bosh maslahatchisi Fiona Xillning aytishicha, uning sobiq xo‘jayini “o‘zining xarizmasiga haddan tashqari tayanadi” va u Ukraina va Rossiya rahbarlari bilan muzokaralar stoliga o‘tirish orqali ularni yarashtirishi mumkinligiga ishonadi.
U, shuningdek, Tramp jamoasi Rossiyaning Ukrainaga bostirib kirishini Yevropa xavfsizligi va butun dunyo tartibiga tahdid emas, balki“ oddiy hududiy nizo” sifatida qabul qilishini taʼkidladi.
Izoh (0)