Rossiya hukumati Tbilisidan mustaqilligini eʼlon qilgan Abxaziyaning Gruziya bilan chegarasida harbiy dengiz bazasi qurish ustida ish olib bormoqda. Bu haqda Gruziya prezidenti Salome Zurabishvili bergan bayonotga asoslanib, Anadolu nashri xabar berdi.
Gruziya tomoni bergan maʼlumotlarga qaraganda Rossiya allaqachon baza qurish ishlarini boshlagan. Buning uchun Ochamchira shahrining sohilbo‘yi hududi tanlangan.
“Ochamchira bazasi uchun (Rossiya tomonidan) dastlabki ishlar olib borilmoqda. Bu jiddiy muammo, chunki bu nafaqat bizga, balki butun Qora dengiz mintaqasi mamlakatlari xavfsizligiga tahdid olib keladi”, degan Salome Zurabishvili Tbilisida ommaviy axborot vositalariga bergan intervyusida.
Rossiyaning Gruziyadan ajralgan hududda yangi doimiy baza tashkil etish qarorini tanqid qilgan Zurabishvili mamlakat bosh vaziri Irakliy Kobaxidze va uning hukumatini Abxaziya, shuningdek, Janubiy Osetiya mintaqasiga nisbatan samarali siyosat olib bormayotganlikda ayblagan. Gruziyaning bu ikki mintaqa borasida hech qanday aniq dasturi yo‘qligi va munosabatlar yomonlashuvi davom etayotgani tanqid qilingan.
Zurabishvili o‘z nutqida Abxaziya va Janubiy Osetiya aholisiga Gruziya fuqaroligini berish kerak ekanligini aytgan. Bu tadbir ikki alohida hududni yana qayta Tbilisiga integratsiya qilishi mumkinligini maʼlum qilingan.
Rossiya hukumati hozircha Gruziya rasmiysining yangi fuqarolik borasidagi bayonotiga munosabat bildirmagan. Abxaziyadagi yangi baza haqida esa na rus davlat nashrlari va na mahalliy matbuot maʼlumot taqdim etmagan.
Hozirda Rossiya bevosita taʼsirga ega bo‘lgan Abxaziya va Janubiy Osetiya 2008-yilda Gruziyadan mustaqillik eʼlon qilgan. Bu voqeadan ko‘p o‘tmay Moskva ikki hudud mustaqilligini tan olgan. Bunga javoban esa Gruziya Rossiya bilan aloqalarini uzgan. Abxaziya va Janubiy Osetiya hukumatlari hozirda nisbatan mustaqil, Rossiya bilan hamkorlikda siyosat yuritsa-da, xalqaro hamjamiyat ularni hanuz Gruziya taʼsir doirasi deb tan oladi.
Rossiya 2008-yildan keyin Abxaziya bilan ko‘plab savdo, transport va harbiy kelishuvlar tuzgan. Hududni Rossiyaga integratsiya qilishga harakat qilindi. Hattoki Abxaziyaning ayrim vakillari Rossiya bilan birlashish g‘oyasini targ‘ib qila boshladi.
2023-yilning oktyabr oyida Rossiya va Abxaziya hukumatlari Ochamchira tumanida Qora dengiz flotiga qarashli harbiy-dengiz inshootini tashkil etish bo‘yicha kelishuvga erishgan. Qurilish ishlari qachon boshlanishi esa xabar qilinmagan edi. Qora dengiz hududining ko‘plab mamlakatlari o‘sha paytda kelishuvga munosabat bildirib, Gruziyaga bosim qilmaslikni, Abxaziyada harbiy inshootlar joylashtirmaslikni talab qilgan.
Izoh (0)