Agar Gruziyada kuzda bo‘lib o‘tadigan saylovlarda muxolifat g‘alaba qozonsa, mamlakatda Rossiyaga qarshi ikkinchi front ochilishi mumkin. Bu haqda Gruziya bosh vaziri bergan bayonotga asoslanib, EurAsia Daily nashri xabar berdi.
Bosh vazir Irakliy Kobaxidze muxolifatning g‘alabasi Gruziya uchun tashqi siyosat kursi o‘zgarishini anglatishini aytgan. Bu esa mamlakatning hukumatdan ajralgan qismlarini qayta nazoratga olish uchun Rossiya bilan urushga kirish mumkinligini anglatadi.
26-oktyabrdagi saylovlardan so‘ng Gruziya bir necha kun ichida Rossiyaga qarshi harbiy amaliyotlarning “ikkinchi fronti”ga aylanib qolishi mumkin. Hozirda mamlakat hukumatini ham, Gruziyadagi yondosh siyosiy kuchlarni ham urushga undayotgan xorijiy manbalar yetarlicha. Bosh vazir Rustavi 2 telekanaliga bergan intervyusida ham bu bayonotlarni takrorlagan.
Kobaxidzening taʼkidlashicha, u voqealarning bunday rivojlanishi haqida o‘zida mavjud bo‘lgan maʼlumotlar va oldingi siyosiy tajribaga asoslanib gapirgan. Gruziyada ham katta ehtimol bilan Ukrainaga o‘xshash ssenariy tayyorlanayotgan bo‘lishi mumkinligi xabar berilgan.
Avvalroq Gruziya Davlat xavfsizlik xizmati mamlakatda davlat to‘ntarishi uyushtirish va hukmron “Gruziya orzusi” partiyasi asoschisi Bidzina Ivanishvilini o‘ldirilishga uringan guruh aniqlangani haqida xabar bergan edi. Maxsus xizmatga ko‘ra, ushbu keskin va provokatsion harakatni tashkil qilish bilan Ukrainada bo‘lib turgan gruziyalik sobiq amaldorlar shug‘ullanmoqda.
Rossiya prezidenti matbuot kotibi Dmitriy Peskov Rossiya Ivanishviliga suiqasdni har qanday boshqa shunga o‘xshash urinishlar kabi qoralashini aytgan. Mamlakatda barqarorlik saqlanishi Rossiyaning ham manfaatlariga to‘g‘ri kelishi aytilgan.
Izoh (0)