Toshkent viloyatida amalga oshirilayotgan Janubiy Koreya tajribasi asosida ko‘chat ekilishi 10 kun muddatda taʼminlanadi. Viloyat hokimi Zoir Mirzayevning bu boradagi tegishli qarori qabul qilindi.
Qayd etilishicha, Janubiy Koreya tajribasi asosida Nurafshon va Bekobod shaharlari, O‘rta Chirchiq, Toshkent va Ohangaron tumanlari hududidan jami 34 gektar yer maydoni 30 yil muddatga obodonlashtirish boshqarmalariga biriktiriladi.
Har 1 gektar yer maydoni uchun mahalliy byudjetdan 100 million so‘m mablag‘ ajratiladi va tomchilatib sug‘orish tizimi joriy qilinadi.
Bunda, yerni tayyor holga keltirib, daraxt ekishga xohishi bo‘lgan aholiga o‘zi istagan turdagi ko‘chatni ekishi uchun sharoit yaratib, har bir daraxt ko‘chat ekkan shaxs nomiga tamg‘alanadi. Daraxtlarni parvarishlash uchun obodonlashtirish boshqarmasi shtatlari doirasidagi har 1 gektar uchun bir nafar xodim biriktiriladi.
Shuningdek, shahar va tuman obodonlashtirish boshqarmalari shtat birliklari doirasida “Yashil kelajak bog‘i” bo‘limlari faoliyati tashkil etiladi.
Aprel o‘rtalarida ekologiya vaziri maslahatchisi, jamoatchilik faoli Rasul Kusherbayev poytaxtda tuman ekologiya bo‘limi mas’ullari IIB xodimlari hamda prokuratura organi tomonidan qo‘shib yozishga majburlanayotgani, buni bajarmagan mas’ullar 10 soatlab IIB binosida noqonuniy ushlab turilganini xabar qilgandi. Toshkent shahar prokuraturasi axborot xizmati rahbari Xurshida Rahmonovaning “Daryo”ga bildirishicha, holat Toshkent shahar prokurori Erkin Yo‘ldoshev nazoratiga olingan.
Izoh (0)