O‘zbekistonning bugungi sud tizimi katta islohotlarga muhtoj. Bu haqda Prezident administratsiyasi rahbarining o‘rinbosari Komil Allamjonov Telegram'dagi kanalida post qoldirdi.
Komil Allamjonovning yozishicha, bugun, 11-avgust kuni administratsiya rahbari Sardor Umrzoqov boshchiligida sud tizimi masalasida yig‘ilish o‘tkazilmoqda.
“Adolatli sud tizimisiz hech qanday rivojlanish bo‘lmaydi. Va bugungi sud tizimi katta islohotlarga muhtoj. Ayni daqiqalarda Sardor Umrzoqov kuni kecha Senat tomonidan tasdiqlangan Oliy sudning yangi raisi Baxtiyor Islomovni jamoaga tanishtirmoqda. Yig‘ilish juda keskin va tanqidiy o‘tyapti. Chunki bugun jamoatchilikning aksariyati sud tizimidan mutlaqo norozi. P.S. Xatolarni tuzatish payti keldi” – deb yozgan u.
Oliy Majlis qonunchilik palatasi deputati Rasul Kusherbayev mazkur xabarga munosabat bildirdi.
“Xuddi shunday. Afsuski islohot va o‘zgarishlarni boshida bo‘lishi kerak bo‘lgan bu sohada ancha kech qoldik: sud qo‘l boshqaruviga o‘tib qolgandek. Biroq hechdan ko‘ra kech yaxshi. Ko‘ramiz bundan buyon suddan odamlarning roziligi ortadimi yo‘qmi”, – deya qayd etdi deputat.
Shuningdek, “Davletovuz” kanalida ham Komil Allamjonovning xabariga fikr bildirildi.
“Jamoatchilik O‘zbekistondagi sud tizimidan norozi. Sudlarning mustaqilligi borasida ko‘p yillar davomida savollar paydo bo‘lgan. Adolatsiz qarorlar natijasida tizimga shikoyatlar haddan tashqari ko‘payib ketgan. Shu ma’noda bugungi yig‘ilish ham o‘ta tanqidiy ruhda o‘tayotgani ma’lum qilindi. Isloh qilinishi kerak bo‘lgan sohalar juda ko‘p, lekin menimcha, ularning ichida eng ko‘p islohotlar aynan sud tizimida amalga oshirilishi kerak. Mustaqil, adolatli sud bo‘lmas ekan, biz xohlagan jamiyatni yarata olmaymiz. Yangi rahbar oldida hal qilinishi lozim bo‘lgan ulkan mas’uliyatli vazifa turibdi”, – deb yozadi muallif.
Avvalroq Baxtiyor Islomov Oliy sud raisi etib saylangani xabar qilingandi.
Izoh (0)