Falastinning HAMAS harakatiga tayinlangan yangi rahbar Yahyo Sinvar Misr va Qatar vositachilari orqali Isroilga sulhga erishmoqchi ekani haqidagi xabarni yetkazdi. Bu haqda CNN telekanali Isroildagi o‘z manbasiga tayanib xabar berdi.
Isroil bosh vaziri Binyamin Netanyaxu buni xohlayaptimi yoki yo‘qmi, hozircha noma’lum, deya aniqlik kiritadi telekanal.
CNN’ning hukumatdagi ikki manbaga tayangan holda bergan xabariga ko‘ra, Netanyaxu hukmron koalitsiya uchun qanday oqibatlarga olib kelishidan qat’i nazar, kelishuvga tayyor. Biroq Isroilning bir qator xavfsizlik agentliklari bosh vazirning koalitsiyadagi ayrim o‘ta o‘ng vazirlarning kelishmovchiligini inobatga olib, uning tayyorligiga shubha bilan qaramoqda.
Isroil moliya vaziri Bezalel Smotrich sulhga qat’iyan qarshi bo‘lib, uni “taslim bo‘lish” deb atagan. Avvalroq mamlakat milliy xavfsizlik vaziri Itamar Ben-Gvir ham sulhga e’tirozlar bildirgan edi.
61 yoshli Yahyo Sinvar 2023-yil oktyabr oyida HAMASning Isroilga uyushtirgan hujumining tashkilotchisi hisoblanadi. Guruh Sinvarning Siyosiy byuro rahbari etib saylanganini 6-avgust kuni, Tehronda Ismoil Haniya o‘ldirilganidan bir hafta o‘tib eʼlon qilgan edi.
Sinvar HAMAS siyosiy byurosi rahbari etib tayinlangach, Isroil TIV rahbari Isroil Kats uni tezroq yo‘q qilishga chaqirgan edi.
Ismoil Haniya o‘rniga bosh terrorchi Yahyo Sinvarning HAMASning yangi rahbari etib tayinlanishi uni imkon qadar tezroq gumdon qilish va bu yovuz tashkilotni Yer yuzidan yo‘q qilish uchun yana bir jiddiy sababdir, deb yozgan Kats.
Yahyo Sinvar HAMASning eng ko‘p qidirilayotgan yetakchilari ro‘yxatidan joy olgan. Guruhning Isroilga hujumidan so‘ng u omma oldida ko‘rinmay qolgan va G‘azo ostidagi yerosti tunnellarida yashiringan deb taxmin qilingan.
Izoh (0)