Yahyo Sinvar HAMAS siyosiy byurosi rahbari etib tayinlangach, Isroil TIV rahbari Isroil Kats uni tezroq yo‘q qilishga chaqirdi.
“Ismoil Haniya o‘rniga Yahyo Sinvar HAMASning yangi rahbari etib tayinlanishi uni tezroq yo‘q qilish va bu yovuz tashkilotni yer yuzidan o‘chirib tashlash uchun yana bir yaxshi sababdir”, deb yozdi u X ijtimoiy tarmog‘ida.
61 yoshli Yahyo Sinvar Falastin HAMAS harakatining yangi siyosiy rahbari etib tayinlangan edi. Sinvarning HAMAS rahbari etib saylangani Ismoil Haniya Tehronda o‘ldirilganidan bir hafta o‘tib e’lon qilindi. Sinvar guruhning eng ko‘p qidirilayotgan yetakchilari ro‘yxatida. Guruhning Isroilga hujumidan so‘ng u omma oldida ko‘rinish bermagan va G‘azodagi yerosti tunnellarida yashiringan deb taxmin qilingan.
Sinvardan avvalgi HAMAS rahbari Ismoil Haniya 31-iyul kuni Tehronda o‘ldirilgan edi. HAMAS va Eron qotillikda Isroilni ayblagan. Eron oliy rahnamosi Oyatulloh Xomanaiy Isroilni jazolashga chaqirgan. Isroilning o‘zi Haniyaning o‘ldirilishiga izoh bermagan.
Haniya o‘ldirilishidan bir necha soat avval Isroil Livandagi “Hizbulloh” harakati qo‘mondonlaridan biri Fuad Shukrni yo‘q qilgan. “Hizbulloh” yetakchisi Hasan Nasrulloh ham Isroilga javob zarbalari berishga chaqirgan.
Xalqaro hamjamiyat mintaqadagi inqirozni yumshatish uchun harakat qilmoqda. AQSH Davlat kotibi Entoni Blinkenga ko‘ra, AQSH keskinlikni yumshatish uchun “kecha-yu kunduz ishlamoqda”. Avvalroq u Eron va Isroilni mojaroning avj olishidan qochishga chaqirgan.
“Keyingi zarbalar hech kim bashorat qila olmaydigan yoki to‘liq nazorat qila olmaydigan xavfli oqibatlar ehtimolini oshiradi”, deya ogohlantirgan Blinken.
Izoh (0)