Gvatemala hukumati o‘z hududi janubi-sharqida yahudiy “Lev Tahor” yahudiy sektasi vakillari tomonidan ushlab turilgan 160 nafar bola va o‘smirni ozod qildi, deb xabar bermoqda Reuters.
“Ko‘rsatmalar, olingan dalillar va tibbiy ko‘riklar asosida bu sektada voyaga yetmaganlarga nisbatan odam savdosining turli shakllari, majburiy nikohlar, zo‘ravonlik va shunga o‘xshash jinoyatlar sodir etilganini aniqladik”, dedi Gvatemalaning odam savdosiga qarshi kurash prokuraturasi vakili Nensi Payis matbuot anjumanida.
Operatsiyada 400 dan ortiq huquq-tartibot xodimlari, jumladan, psixologlar va harbiylar ishtirok etdi. Bu sekta aʼzolari qattiq tartib-intizomni qo‘llash, jumladan, ommaviy jazolash, majburan turmush qurish va bolalarni ota-onasidan ajratishda ayblanmoqda.
Bu ayblovlar reyd uchun asos bo‘ldi. Gvatemaladagi yahudiylar markazi “Lev Tahor” sektasining bu jinoyatlarga aloqasi yo‘qligini taʼkidladi. Markaz holat yuzasidan tergov o‘tkazishni qo‘llab-quvvatladi va xalqaro hamjamiyatni qurbonlarni himoya qilish uchun hamkorlik qilishga chaqirdi. Hozirda tergov davom etmoqda.
“Lev Tahor” sektasi 1980-yillarda Quddusda Shlomo Xelbrants tomonidan asos solingan bo‘lib, “gunohkorlarga nafrat” tamoyilining radikal talqinini yoqlaydi.
2013-yilda bu sekta Gvatemalaga, keyinroq baʼzi aʼzolari Meksikaga ko‘chib o‘tdi. 2017-yilda sekta asoschisi vafotidan so‘ng, guruh qatʼiy diniy qoidalarga rioya qilgan holda o‘z faoliyatini davom ettirdi.
Bu sekta Isroil davlatini rad etadi, voyaga etmagan qizlar uchun “kelishuv nikohlari”, jismoniy jazo va boshqalarni qo‘llaydi. Bu sekta aʼzolari ichida Isroil, Kanada, AQSH va Gvatemala fuqarolari bor.
Izoh (0)