Ағдарилган президент Башар Асад ҳали ҳокимиятда бўлган пайтда Сурия ҳукумати миллионлаб доллар ва евро ортилган самолётларни Россияга жўнатган. Бу ҳақда махфий ҳужжатларга таяниб, Financial Times хабар берди.
Нашр маълумотларига кўра, пул ўтказишлар 2018-2019 йилларда амалга оширилган ва маблағлар Сурия Марказий банкига тегишли бўлган. Кўрсатилган даврда мамлакатда чет эл валютасининг кескин тақчиллиги кузатилган. Ўша пайтда захиралар “деярли нолга тенг эди”, дейди манбалар.
Шундай бўлса-да, Асад ҳукумати Москванинг Внуково аэропортига 250 миллион долларга тенг бўлган нақд доллар ва евро жўнатган — номинал қиймати 100 доллар ва 500 евроли купюраларнинг оғирлиги тахминан 2 тоннани ташкил этгани айтилмоқда.
2018 йил мартдан 2019 йил сентябргача валюта ташиш учун жами 21 та авиақатнов амалга оширилди. Россияга олиб кирилган барча маблағлар кейинчалик у ердаги банкларига жойлаштирилган. Бундан ташқари, Асад оиласи Россияда яширин равишда активлар, жумладан, элита кўчмас мулклар сотиб олган. Хусусан, улар Москва-Ситининг элита ҳудудида қиймати камида 40 миллион долларлик 19 та ҳашаматли квартира харид қилган.
2018-2019 йилларда, Сурия Марказий банки Москвага самолётларда нақд пул жўнатаётган пайтда, Асад режими кўп жиҳатдан Россиянинг ҳарбий ёрдамига таянарди, деб эслатади ФТ.
Шу йилнинг ноябрь ойи охирида Сурия мухолифати, унда асосий ролни “Ҳайъат Таҳрир аш-Шом” гуруҳи ўйнайди, Идлиб вилоятидан дастлаб Суриянинг иккинчи йирик шаҳри Ҳалабга, кейин эса пойтахт Дамашққа ҳужум бошлади. 8 декабрь куни қўзғолончилар Асад режимини ағдарганликларини эълон қилди.
2000 йилдан бери президентлик лавозимини эгаллаб келган 59 ёшли Асад Сурия исёнчилар ҳужуми фонида Россияга қочиб кетди ва у ерда бошпана топди. Bloomberg маълумотларига кўра, Асадни хавфсиз эвакуация қилишга Россия ҳукумати кўндирган, қочишни эса Россия разведкаси ходимлари ташкил этган.
Улар Сурия президенти ва оиласини Россия авиабазасидан фойдаланиб олиб чиқиб кетган. Асадни олиб кетаётган самолётда кузатувдан қочиш учун транспондер ўчириб қўйилган.
Президент Владимир Путин Россия махсус хизматларидан Асад режимига тобора кучайиб бораётган таҳдидни нега жуда кеч пайқаганларини тушунтиришни талаб қилган, деб ёзади Кремлга яқин бўлган Bloomberg манбаси.
Дастлаб, Россия ҳарбийлари Суриядаги қуролли гуруҳларга зарба бериб, уларни сиқиб чиқаришга ва Асад кучларини мустаҳкамлашга ҳаракат қилган.
Бироқ Сурия ҳукумат қўшинлари “сезиларли қаршилик кўрсатмагани” ва исёнчилар Ҳалаб ҳамда Ҳаммани эгаллаб, стратегик аҳамиятга эга Ҳомс шаҳрига ҳужум бошлагани сабабли, Россия Асад режимини ҳимоя қила олмаслигини тушуниб етган, дея таъкидлади FТ манбалари.
Изоҳ (0)