Bugun, 4-iyul kuni ertalabdan Fransiya bosh vaziri Elizabet Bornning avvalgi hukumatidagi vazirlar almashtirila boshlagani haqida xabarlar keldi, deb yozadi “Kommersant”. Kechki payt yangilangan vazirlar mahkamasi majlisga yig‘ilishi e’lon qilindi.
Vazirlarni o‘zgartirish prezident Emmanuel Makronga hukumatni parlament saylovlaridan keyin yuzaga kelgan yangi sharoitlarga moslashtirish uchun kerak bo‘ldi.
1922-yildan buyon birinchi marta bosh vazir hukumatga mutlaq ko‘pchiliksiz rahbarlik qilmoqda. Bu Elizabet Bornga bir talay muammolarni keltirib chiqarishi mumkin, ularning birinchisi ishonchsizlik votumi bo‘yicha ovoz berishning o‘tkazilishi bo‘lishi mumkin, buni parlamentdagi so‘llar talab qilmoqda. Ularni to‘xtatib bo‘lmaydi. O‘tgan hafta parlament guruhlari shakllanganidan keyin Emmanuel Makron bor-yo‘g‘i 250 ta ovozga umid qilishi mumkin, mutlaq ko‘pchilik uchun esa unga 289 ta ovoz kerak.
Hukumatdagi o‘rnidan parlamentga saylovlarda mag‘lub bo‘lgan vazirlar ayriladi. Hukumatning to‘liq tarkibi kunning ikkinchi yarmida ma’lum bo‘ladi.
Eslatib o‘tamiz, Fransiya prezidenti Emmanuel Makronning “Birgalikda!” koalitsiyasi mamlakat parlamentining quyi palatasi — Milliy majlisga bo‘lib o‘tgan saylovlarning ikkinchi bosqichida g‘olib bo‘ldi, biroq mutlaq ko‘pchilik o‘rinni qo‘lga kirita olmadi. U 577 ta o‘rindan 245 tasini egalladi, ko‘pchilik o‘ringa ega bo‘lish uchun unga 40 dan ortiq joy yetmay qoldi.
Fransiya bosh vaziri Elizabet Born ovoz berish yakunlarini izohlar ekan, ularni misli ko‘rilmagan holat deb atadi. “Bu vaziyat mamlakatimiz uchun xavf bo‘lib hisoblanadi, chunki ham milliy, ham xalqaro darajada to‘qnashishimizga to‘g‘ri keladigan muammolarni keltirib chiqaradi”, — dedi u.
Islohotlar o‘tkazish uchun Makron o‘z koalitsiyasidan tashqaridagi deputatlardan ko‘mak olishiga to‘g‘ri keladi, biroq ba’zi partiyalar allaqachon davlat rahbariga yordam berishni istamasligini bildirgan. Masalan, respublikachilar vakillari Makronga nisbatan muxolifat yo‘nalishida munosabatni saqlab qolishini e’lon qildi.
Izoh (0)