Shiddatli bellashuv, vaziyatni o‘zgartirgan qizil kartochka va yakundagi yirik hisob: “Navbahor” va “Paxtakor” o‘yinidan fotogalereya

O‘zbekiston Superligasining 24-turidan o‘rin olgan bahsda Namanganning “Navbahor” jamoasi o‘z maydonida Toshkentning “Paxtakor” klubini qabul qildi.

Joriy mavsumda har ikki klub ham chempionlik va O‘zbekiston Kubogidan mahrum bo‘lgan bo‘lsada, jamoalarda sovrindorlar safidan joy olish imkoniyati borligi, o‘rtadagi prinsipial raqobat, ushbu jamoalar o‘rtasidagi o‘yinlar doimo murosasiz kechganligi bois mutaxassislar hamda muxlislar tomonidan mazkur bellashuvga qiziqish yuqori bo‘ldi. 

Dastlabki daqiqalardan ustunlikni qo‘liga olishga intilgan Sergey Lushan shogirdlari 3-daqiqadayoq hisobni ochishga muvaffaq bo‘ldi. Jamshid Boltaboyevning o‘ng qanotdan mehmonlar jarima maydonchasi ichiga oshirgan to‘pini jamoaning eronlik yarim himoyachisi Siyavash Haqnazari mehmonlar darvozasiga aniq yo‘lladi – 1:0.

36-daqiqada mehmonlar standart vaziyatdan so‘ng muvozanatni tikladi. Oradan 7 daqiqa o‘tar-o‘tmas, Toma Tabatadzening o‘ng qanotdan raqib jarima maydonchasi ichiga oshirib bergan to‘pini Siyavash Haqnazari darvozaga aniq yo‘llab, “dubl”ni nishonladi va “Navbahor”ning tanaffusga 2:1 hisobidagi ustunlik bilan chiqib ketishini ta'minladi.

Ikkinchi bo‘limni hujumkor ruhda boshlagan “sherlar” 46-daqiqada muvozanatni yana tikladi. “Paxtakor” yarim himoyachisi Otabek Jo‘raqo‘ziyev o‘z hisobiga “dubl” yozib qo‘ydi.

Uchrashuvning 56-daqiqasida toshkentliklarning 2-bo‘limda zaxiradan maydonga tushirilgan yarim himoyachisi Behruzbek Asqarov “Navbahor”ning gruziyalik hujumchisi Toma Tabatadzening oyoq qismiga zarba berganligi bois uchrashuv bosh hakami Rustam Lutfulin uni maydondan chetlatdi. Natijada Kamoliddin Tojiev shogirdlari maydonda 10 kishi bo‘lib qoldi. 

Shundan so‘ng “Navbahor” vakillari son jihatidan ustunlikdan samarali foydalandi va hujumni yanada kuchaytirdi. Buning natijasi sifatida “lochinlar” darvozasiga uchta to‘p kiritildi va yakuniy hisob yirik – 5:2 ko‘rinishini oldi.

“Navbahor” shu tariqa tarixiy g‘alabaga erishdi: jamoa o‘zaro uchrashuvlarda “Paxtakor” darvozasiga ilk marotaba 5 ta gol urdi. Namanganliklar ochkolari sonini 39 taga yetkazib, turnir jadvalida 4-o‘ringa ko‘tarilib oldi. 

“Daryo” ushbu o‘yindan fotogalereya tayyorladi.