“Andijon” futbolchilari O‘zbekiston Kubogini qo‘lga kiritsa, har bir futbolchiga Onix avtomobili berilishi haqidagi xabarga izoh berildi

Ijtimoiy tarmoqlarda “Andijon” klubi 5-oktyabr kuni bo‘lib o‘tadigan O‘zbekiston Kubogi finalida “Navbahor” klubini mag‘lub etsa, har bir futbolchiga Onix avtomobili sovg‘a qilinishi haqida xabarlar tarqalgan edi.

Mazkur xabar yuzasidan “Daryo” muxbiri Andijon viloyati hokimligi axborot xizmati bilan bog‘lanib, izoh oldi.

Aytilishicha, tarqalgan xabarlar haqiqatga to‘g‘ri kelmaydi.

Hokimiyat yoki homiylar tomonidan futbolchilarning har biriga avtomobil sovg‘a qilish ko‘zda tutilmagan, — deyiladi hokimlik axborotida.

O‘zbekiston Kubogi final uchrashuvi 5-oktyabr kuni Farg‘ona shahridagi Istiqlol stadionida bo‘lib o‘tadi.

Ma’lumot uchun, O‘zbekiston Kubogi yarim finalida “Navbahor” “Paxtakor”ni, “Andijon” esa “Surxon” klubini penaltilar seriyasida mag‘lub etib, finalga chiqdi.